Kum shi bynta na ka jingrakhe ia ka Meghalaya Environment Week and Water Conservation Day u Myntri jong ka tnad C&RD u bah Hamletson Dohling mynta ka sngi ula pyllait paidbah ia ka Amrit Sarovar Campaign hapoh ka Mahatma Gandhi NREGA and Commutity Nurseries ha ka prorkam kaba la long ha shnong Umphrew, Mawlai C&RD Block.
Haba kren ha ka jingialang u bah Dohling ula ong ba ka jingthmu jong kane ka Campaign ka long ban shna 75 tylli ki pung um ha man la kawei pa kawei ka District hapoh ka jylla. U la ong ba kumba ju long man la u snem la ju rakhe ia kane ka sngi pynneh pynsah mariang tang ha ka 5 tarik u Jylliew jong ka snem, hynre ha kane ka kynti ka sorkar jylla kala rai ban pynlong noh da ka prokram kaba shi taiew lynter ban rakhe bad ban ai ka jingpynsngewthuh paidbah sha baroh ki nongshnong shnong ka jylla halor ka jingdonkam ban pynneh pynsah ia ka mei mariang bad ki sawdong sawkun.
U bah Dohling ula iathuh ruh ba u briew bad ka mariang ki don ka jingiadei kaba iajan eh, kumta ka long kaba donkam ban phikir bad syndong ia ki sawdong sakun khnang ba ka mei mariang kan lah ban pyndaw ia ki jingdonkam ba man ka sngi jong u khun bynriew. Ula ong ruh ba ka jylla Meghalaya ka dei kaba la kyrkhu da ka jingioh ia u slap uba jur, hynrei la katta ruh ka dang don ka jingtyrkhong um ha kiba bun ki bynta, kumta ka pork ala dei ban thaw ki lad ki lynti kumba ban nang ban kynshew ia ka umslap khnang ban ioh pyndonkam ha ki por ba rang ryngkhiang.
Na ka liang jong u bah Dohling ula khot ia ka jingiasnohkti lang jong ki paidbah ha ka ban pynlong ia ki prokram jong ka sorkar kiba jop, bad ba kane ka jingthmu kan long ka jingmyntoi ym tang ia ka pateng hynrei ia ka pateng ka ban sa wan ruh.
Ha kaba iadei bad kane ka jingthmu jong ka sorkar ban shna ia ki pung ban kynshew um ka sorkar kala buh ia ka song pisa kaba T.450 klur tyngka bad na kane T.391 klur tyngka ka dei kaba la pynioh da ka sorkar pdeng ban pynbiang ia ki jingdonkam.
Ha kane ka sngi u Myntri ula sam ruh ia ki khusnam bad syrnod sha ki nongjop jong ka jingiakop dro bad airong kaba la pynlong da ka Umphrew Secondary School, Umphrew. Hadien kane u Myntri ula leit ban thung dieng ha ka jaka kaba la dong jingthmu ban tih ia ka pung. Kiwei de kiba iadon lang ha kane ka jingialang ki kynthup ia u SC Sadhu, Mission Director, State Rural Employment Society, ma P.T. Passah, BDO, Mawlai Block bad kiwei. (MIPR)
