Ka Jaiñtia National Council (JNC) haka 26 tarik April 2025 ka la ioh ban pynkha iaka shnat treikam ba thymmai jong ka bad yn sa tip kum ka Moobakhon-Sehlama Unit.
Ia kane ka jingpynkha ia katei ka unit ba thymmai la pynlong ia ka jingialang ha Nongmulieh Govt. LP School Moobakhon, West Jaiñtia Hills District ba la pyniaid da u General Secretary ka JNC-Western Zone bah H. Lyngdoh.
La ioh ia ki kyntien maitphang bad pdiang burom ia baroh ki dkhot ba thymmai na u bah Mebanteilang Sukhlaiñ bad ki kyntien sneng kyntu kynpham na u bah Nangjan Dkhar, Vice President JNC-CEC bad na u bah Hamehi Bamon President JNC Western Zone bad ia ka kam kaba kongsan kata ka jingiatehkular hapdeng ki dkhot ba thymmai bad ka seng la pyndep da u President Rangbah ka JNC u bah Sambormi Lyngdoh.
Haba ai jingkren hakatei ka jingpynkha unit kaba thymmai u President ka JNC u la ong “Ba kum ki shnong kiba don hajan bha bad ka Assam ngi dei ban tip ia la ka History ka Ri Jaiñtia khamtam iala u pud u sam jong ka khnang ba ngin lah ban iada iala ka jong ka khyndew ka shyiap, la sanphew tam tylli ki snem ki lah leit hynrei haduh mynta ym pat lah ban pynphai ia ka elaka Labang-Nangphyllut sha ka Ri Jaiñtia, u la ong ruh ba kum ka jaidbynriew rit paid ngi dei ban tip bad nang ban ri ban sumar ia la ka jong ka riti ka dustur khamtam ka tipkur ka tipkha bad ngi dei ruh ban nang ban iada ban pynneh pynsah iala ka ktieñ ka thylliej kumba u (L) Professor Barrister Pakem uba ialam ban seng ia kawei ka seng ha ki snem (1976-1977) ka “Seiñ ktieñ Wei thoh Jaiñtia” da kaba pynshong nongrim “Im i ktieñ-Im ka Jaidbru”.
Khatduh u President rangbah ka JNC u la kyntu ia ki dkhot ba thymmai ba kin phikir bad peitngor bha na ka jingwan rung ki briew kiba nabar khamtam ki nong Bangladeshi sha kane ka Ri baieid jong ngi. Kumta u la kyrkhu bad kitbok kitrwiang ia ka Unit kaba thymmai ban kan ai ka jingshakri kaba hok ia la ka Ri bad ka jaidbynriew hi baroh kawei.
Ki nongkitkam ka JNC Moobakhon-Sehlama Unit ki long kumne :-
President -Rikus Lamare
Vice President -Pynshai Shylla
General Secretary -Lereson Kynjing
Assistan Secretary-Yoomi Sumer
Finance Secretary – Plijes Lamare
Publicity Secretary -Datikna Lamare
Assistant Publicity Secretary-Elies Shylla
Education Secretary-Eborlang Lamare
Environment Secretary -Mandakani Lamare
Arts and culture Secretary-Pynshebhaki Dhar
Sport Secretary-Tremi Pajuh
Office Secretary-Richmon Sumer
Bad ki Dkhot 11 ngut.