Ka kynhun ïalehkai jong ka Mukhla FC kala long syndon ka lahduh haka lympung ïalehkai phainal bala tip kum ka (L) Kesilroy Pala Invitation Football Tournament 2023, bala pynïaid da ka West Jaiñtia District Sports Association (WJDSA) kaba la long mynta ka sngi Thohdieng ha madan Kiang Nangbah Stadium, Dongmihsngi Jowai.
Lyngba kane ka nam jop jong ka Mukhla FC kala ïoh khur syndon ïa ka song pisa kaba san (5) lak tyngka ha ryngkat ka Trophy ïa kaba la sam da u kongsan jong kane ka sngi u ma Sniawbhalang Dhar Symbud Myntri Rangbah ka sorkar jylla ha ryngkat ka jingdonlang jong kiba haïing ha sem jong u (L) Kesilroy Pala.
Haba phai sha ka jingïakhun phainal kaba la long hapdeng ka Mukhla FC pyrshah ïa ka Salaroh FC, ka long kaba ïakhaid bha naduh kaba sdang jong ka jingïakhun hynrei dei ha ka minit hashwa ban kut jong ka kylla step ka Mukhla FC kala ïoh ban thep ïa ka shikol lyngba u Primrose Lamat haka minit ba 45+2.
Ha ka jingïakhun jong ka kylla miet ka Salaroh FC kala pyrshang ban pynphai ïa katei ka shikol hynrei kim lah satia namar ka jingtbit jong ki player ba shadien jong ka Mukhla FC. Na ka liang ka Mukhla kala ïoh biang ban thep ïa ka kol ba ar da u juh u player u Primrose Lamat ha ka minit ba 90+5 bad haduh kaba kut jong ka jingïakhun ka Mukhla FC kala jop da 2-0 kol.
Ïa ki khusnam sha ki nongjop la sam da u kongsan jong kane ka sngi haka jingdonlang u ma Ngaitlang Dhar MLA barim, u MLA ka Jowai ma Wailadmiki Shylla, ma Rocky Dhar, ma Dasakhiat Lamare, ki nongkitkam ka WJDSA, ki nongshah khot sngewbha nalor ka jingwan sakhilang jong ki paidbah.
Ïa ka nam Man of the Match la ïoh rah da u Primrose Lamat ryngkat ka song pisa ba 5000 hajar tyngka, katba ïa ka nam Best Goal Keeper la ïoh da u Aibormiki Suchiang bad ka pisa 5 hajar, na ka liang ka kynhun ba wan ba-ar ka Salaroh FC kala ïoh ïa ka song pisa kaba ar (2) lak tyngka lem bad ka Trophy.
La pyntip ba ka jingïakhun jong ka Super League mynta u snem bala pynïaid da ka West Jaiñtia District Sports Association (WJDSA) kan sdang naduh ka 18 tarik mynta u bnai Risaw.
