Ki kyrtong MDC ki ban ïakhun na ka 19-Jowai South Constituency, kila sdang ban duh thiah duh dem na ka bynta ban leit rung ïing briew bad ban leit ïalap Election sha manla ki shnong ki thaw da ka jingkyrshan lang ki nongbud jong ki.
Ïa ka rai pat ka shong ha u paidbah ka 19-Jowai South Constituency ban shim ha ka 21 tarik u Rymphang, 2025 na ka bynta ban pynjop ïa uwei napdeng ki 5 ngut ki kyrtong MDC ki ban ïakhun ïa ka Election napoh kane ka Constituency.
Kine ki 5 ngut ki kyrtong ki long U ma Saron Paswet uba dei ruh u sitting MDC na ka seng Congress (INC) uba shong basah ha Panaliar Jowai, U ma K. Dikylsingh Phawa na ka Nationalist People Party (NPP) uba shong ba sah ha Dongmihsngi Jowai, U ma Iaibatlang Talang na ka Voice of the People Party (VPP) uba shong basah haka shnong Mustem, U ma Heimonmitre Phawa na ka Bharatiya Janata Party (BJP) uba dei na ka Shnong Ialong bad uba shong ba sah mynta ha Mookyrdup, Jowai bad U ma Moonlight Pariat kum u kyrtong shimet (IND) uba shong ba sah ha Khimusniang Jowai bad uba la ju long teng u MDC bad CEM ba rim ka JHADC.
Kine ki kyrtong kiba la pynkhreh bha ban ïa aireng kin sa tip ïa ka rai ba khadduh ha ka 24 tarik mynta u bnai kaba dei ka sngi ñiew vote na ka bynta ban jied uwei napdeng kitei ki san ngut kum u MDC u ban leit mihkhat sha ka JHADC ban ïasait na ka bynta ki paid ka 19-Jowai South Constituency bad ban trei ïa ka bha ka miat hapoh ka District Council hi baroh kawei.
La ïoh jingtip ba na ka liang ka Dorbar Shnong Khimusniang (DSK) Jowai kan pynlong tang shisngi ïa ka jingïalap Election kata da ka Common Platform ha ka 14.2.2025 hapoh ka shnong, baroh kitei ki 5 ngut ki kyrtong kin wan ha katei ka sngi ban pynsngew ïa la ki jong ki jong ki nongrim sha ki paidbah.
Kumban shu pyntip ba ki shnong kiba hap hapoh kane ka 19. Jowai-South Constituency ki kynthup ïa ka Dulong-A, Dulong-B, Dulong-C, Dulong-D, Panaliar-A, Panaliar-B, Khimusniang-A. Khimusniang-B, Iongnoh, Moobyrni, Dongmihsngi-A, Dongmihsngi-B, Chyrmang, Ialong-A, Ialong-B, Ialong Luti Tuber, Mustem-A bad Mustem-B.