U CEM ka Khasi Hills Autonomous District Council (KHADC) u bah Pyniaid Sing Syiem, u la kyrpad Ia ka 16th Finance commission ban pynsngew lem sha ka MinistRy of Finance haba iadei bad 5 tylli ki mat jong ka council.
Haba kren sha ki lad pathai khubor mynta ka sngi ka 1 tarik Nailur 2024 u la pynpaw ba 5 tylli ki mat u la kyrpad Ia ka 16th finance commission ban pynsngew sha ka sorkar India lyngba ka Ministry of Finance.
Ka mat ba nyngkong eh ba ki pynsngew ka long ban wanrah ia ka mang kyrpang na bynta ka roi ka par ha ka council baroh kawei. Ha District council ngi don 29 tylli ki constituency bad ngi la pynsngew bad ai jingmut lyngba ka 16th finance commission sha ka sorkar India ban bhah kyrpang na ka bynta 5 snem kumba 500 klur na bynta ka roi ka par jong ka council khamtam ia ki shnong ban shna ia ki ing dorbar, ki jaka jngohkai hapoh shnong, ki jaka training, ki jaka ialehkai, ki skul ki college kine baroh ki kynthup lang ha ka 500 klur.
Ka mat ba ar ka long ban tei shuh ia ki iew ki hat ki hima bad ka iew jong ka council namar la sngewthuh ba kan poi ka por ym lah ban pan pisa sah na ka sorkar pdeng bad hap ban leh ia kino kino ki project ba lah ban ieng ha la ki jong ki kjat. “Ka iew ka dei ka kawei kaba ngi buh hakhmat kum ka iewduh ka iew hima ka iew mawphlang, ka iew Nongstoin, ka iew Byrnihat, ka iew laitlyngkot kiba iadei bad ka hima bad ka District Council bad ngi la buh ka jingai jingmut ban bhah kyrpang 120 klur ban tei ia kine ki iew jong ka District Council, lyngba ka jingdon jong kine ki iew kan long ka jingkiew ha ka ioh ka kot bad ban myntoi ki nongkhaïi bad kumjuh ia ki nongrep bad kan ai jingmyntoi ruh ia ka council ban kiew ha ka ioh ka kot bad lada ka ioh ka kot ka kiew ka jylla ruh ka kiew” la ong u CEM.
Ka mat kaba lai ka dei ka shaphang ka arts & culture bad tourism bad ngi la pynsngew sha ka 16th finance Commission ba katne ka spah mariang ngi la don ngin pyndonkam khnang ban kyntiew Ia ka ioh ka kot jong ka council bad ban ai kam ai jam Ia ki khun samla ki bym don kam don jam bad ngi la buh ka jingkyrpad ban bhah kyrpang kumba 200 klur na bynta ka arts culture bad tourism.
Ka mat kaba saw ka dei halor ban wanrah Ia ki technology jingnang jingtip na ka bynta ka building halor ka solid waste management ban ngin Ia trei lang bad ka world bank na ka bynta ka solid waste.
Ka mat ba khatduh ka dei halor ka khadc ka ioh Ia ka bhah na ka Council kumjuh na ka sorkar jylla ki long u dewiong ngi ioh 25% na ka 100%, ngi ioh bun na u mawshun bad ba khambun eh kadei na ka motor vechicle kumba 60%na ka 100% bad da kumno kumno ngi ioh kumba 25klur ne 30 klur ha ka shisnem ban siew tulop Ia ki nongtrei bad ki don ki khajna ba ka council ka ioh kum ki professional tax, ki trading license, ki building fees bad kiwei kiwei kine baroh da khein lang ki poi sha ka 15ne 20 klur ha ka shisnem bad ka jinglut baroh ha ka council ha ka shisnem ka poi kumba 60 klur bad kaba duna ngi hap ban ieng ha la ki jong ki kjat ban ioh na ki project kiba ngi pyndonkam.
Kaba kham kongsan ka dei halor ka jingmang pisa kyrpang lyngba ka finance ministry lyngba ka head jong ka Revenue Deficit Budget Grant kane ka mang kyrpang ha ri India tang ha ki states ne ki institutions ki ba la don ha ka Constitution ki tnad treikam ki bym lah ban siew tulop ia ki nongtrei jong ki ka don ka deficit budget ban mang kyrpang na ka bynta jong ki bad ngi la pan kumba 100 klur ha ka shi snem na ka Revenue deficit budget grant ban pynkhlaiñ ia ka tnad treikam jong ka council.
