Ka Sonapyrdi Tourism & Economic Development Society (STEDS) ka la ioh ban pyndep ia ka jingiaid kjat ne ka Trekking sha u Lum Musliang kaba ar sngi lynter kata ha ka 28 bad 29 tarik Naiwieng 2025. Kane ka dei ka 2nd Trekking ba la pynlong da kane ka society.
Ha kane ka trekking mynta ka snem la wan ban shim bynta da u Principal ka Jaiñtia Eastern College u Dr. P. Nongtdu kynthup ki shynrang bad kynthei na ki shnong bapher kiba napoh ka District bad nabar ka District ruh. Ka trekking ka long kaba sngewtynnad ha kaba baroh ki nongiashim bynta ki la ia poi lang ban ioh iuh kjat ha kliar u lum Musliang kaba ka thong jong kane ka trekking ruh ka long ban leit iuh kjat halor utei u lum. Une u lum Musliang uba lah ban iohi na surok bah (NH-6).
Ka Sonapyrdi Tourism Economic & Development Society (STEDS) hapoh ka jingialam u Bah Kwilnis S Suchiang President bad u Bah Tackmon L Gympad Secretary ki la pynpaw ka jingkmen ban ialam ia ka group jong ki nongiashim bynta baroh da kaba ai khublei ruh ia tnat Wildlife Division ba ka la ai jingbit (Permission) ia ka society ban pynlong ia ka Trekking hapoh Narpuh Wildlife sanctuary bad sngewnguh ruh ia ki staffs ba ki la btin (Guide) lynti ia ngi.
Ha ka sngi sdang ban iaid, ka kynhun ka la ioh ban sahmiet ha Umswang sha shiliang Wah Lukha mar pyrshah ka shnong Sakhri da kaba ngi jam sha shiliang da ka lieng bad ha ka sngi kaba bud (Day 2) ka kynhun ka la mih 7:30am ban sdang pat ia ka jingiaid lynti. Ngi la sakhi ia ka jingitynnad ka mariang ka jingpah sngewthiang ki sim, ngi ring mynsiem ia ka lyer ba iwbih suhsieng, la ong uwei napdeng ka kynhun. Ka trekking sha ki lawbah lawsan kam dei kata ka jingmut kaba kut tang ha kata ka jingiaidkjat, hynrei ka ai ia kata ka jingmut ban sngewthuh ia ka jingkyrdor ka koit ka khiah, ka jingkordor ka mariang, ki umbam umdih, ki sim ki doh. Da ka jinglah ban pynneh ia ki dieng ki siej, ngi lah ban im lem bad ki. Ka trekking ka dei ruh ka bynta ban don ka jingiadei ha ka jingiaieit para briew ban klet ia ki jingsniew ba bun jait.
Kyrwoh na u Lurstep Syih Publicity Secretary Sonapyrdi Tourism & Economic Development Society (STEDS)
