Ka Hindi Catholic Community (HCC), kaba don hapoh ka Mary Help of Christians Parish, Shillong, da ka jingiasnohkti lang bad ka sorkar jylla kala rakhe ia ka taiew pynneh pynsah mariang ka jylla bad ruh ha ka sngi kynmaw ia ka jingpynneh mariang kaba dei ka 5 tarik u Jylliew.
Ha kaba iadei bad kane kala pynlong ia ka prokram thung dieng ha Pastoral Centre ha nongbah Shillong ha kaba 200 ngut ki dkhot kila wan ban iashim bynta. Ha kane ka sngi kila ioh ban thung kumba 20 tynrai u ki plum, 20 tynrai ki peach, 10 tynrai ki camellia, 5 tynrai ki apple bad 2 tynrai ki azaleaplant. Ia kine ki jingthung la pyndonkam da ka sboh Vermi Compost ne ka sboh wieh haba thung ia ki.
Na ka liang ki dkhot kila shimti dala ka mon sngewbha haduh 3 snem ban pynheh pynsan ia kine ki jingthung da kaba khmih lynti ban kin im shispah na ka shispah. U Rev. Fr. A.L. Jose, SDB, Rector of Pastoral Center ula kular ban sumar bha ia kine ki jingthung. U T. Jude Xalxo, uba dei u Secretary ka HCC bad Dy. Project Director, MBMA ula ong ba kum ka kynhun ki tip ba ka mei Mariang ka long ka nongbsa bam, nongbha um bad lyer khlem da hap ban siew dor bad ruh baroh jingdonkam jong u bynriew, kumta ula ong ba ka kamram kaba hakhmat eh jong u briew ka long ban ri ban sumar ia ka mei Mariang.
