Da ki spah ngut ki samla bym pat don kam don jam bad kiba kwah ioh kam jong ka West Jaiñtia Hills District ki la ïashim bynta ha ka prokam thungkam thungkam ne ka Recruitment Drive kaba la long ha District Library Auditorium, Mynthong, Jowai mynta ka sngi 18 tarik, kaba la pynlong da ka Meghalaya State Skill Development Society of MSSDS, Jowai.
U bah Lambor Suchen, Skill Development Officer ka MSSDS, West Jaiñtia Hills District, u la pynpaw ba ka thong ba hakhmat eh jong ka MSSDS ka long ban ai ïa ki jinghikai kiba pynshong nongrim ïa ki sap ki phong ïa ki samla kiba la pyndep ïa ki jingpule bad kumjuh ruh ïa ki samla kiba la pep skul. U la ong ba kane ka jingthmu ka long ban pyndap ia ki samla da ki sap jong ki, kiba iadei bad ka kam karkhana kaba pynlah ia ki ban ioh kam ioh jam bad ban lah ban shaniah ha lade.
Shuh shuh u bah Lambor u la pyntip ba ka ophis ka dang pynlong ia ka jingpyntip ne pynshai iaka rukom thung kam mynta ka sngi ha ka District ban iarap ia ki samla bym don kam ban ioh kam ha kylleng ki bynta bapher bapher la ka long hapoh ka ri India bad shabar ruh. U la pyntip ruh ba ka ophis jong ka MSSDS ka la rung ha ka jingiatreilang bad ka Germany, Japan bad Singapore ban pynsuk ia ki lad ioh kam shabar ri na ka bynta ki samla trai ri.
U la bynrap ruh ba ki kyrtong ba la jied na ka bynta ka kam international ki lah ban khmih lynti ïa ka tulop kaba sdang naduh Rs.90,000/- haduh Rs. 3,00,000/- shi bnai katba kito kiba la buh hapoh ka ri India ki lah ban khmih lynti ia ka tulop kaba sdang naduh Rs.18,000/ haduh 60,000/- shibnai katkum ka jingtbit bad ka sap jong ki.
U la ong shuh shuh ba kane ka jingthmu ka long shi bynta na ka jingpyrshang jong ka sorkar kaba dang ïaid shakhmat hapoh ka jingïalam jong u Myntri Rangbah ka Jylla ban pynkupbor ïa ki samla bad ban thaw ki lad ai kam ai jam ïa ki pateng kiba dang wan.
Ha kaba sdang ki samla (Candidates) ki hap ban pynrung kyrteng shwa ïalade, bud sa ka jingai jingmut ban sngewthuh kham bha ïa ki sap bad ki thong jong ki ha ka kam bapher bapher, hadien kata la khot ïa ki samla ba la jied ban leit sha ka interview.
Kum kane ka programme yn sa pynlong ha Amlarem Sub-Division, Amlarem lashai ka sngi ka 19 tarik mynta u bnai.
