-EASTERN AIR COMMAND INDIAN AIR FORCE : KA NONGPEIT BA NYNGKONG BAD KA NONGPYLLAIT IM IA KA THAIN SHATEI LAMMIHNGI-
Ka Indian Air Force ka dang rakhe ia ka lyngkhuh dap 91 snem ha ka 8 tarik u Risaw 2023. La sdang ia ka Indian Air Force ha ka 8 tarik u Risaw, 1932. Ia ka Indian Air Force la phiah sha 7 tylli ki Command. Ka Headquarter jong ka Eastern Air Command ka don ha Upper Shillong bad ka dei kawei na ki atiar jong ka Indian Air Force. Ka Eastern Air Command (EAC) ka peit ia ki kam pynher liengsuin ha ka jaka kaba heh kaba don ha 12 tylli ki jylla. Kine ki kynthup ki hynniew tylli ki jylla ka thain shatei lammihngi, ka Sikkim,
West Bengal, Bihar bad katto katne ki bynta ka Orissa bad Jharkhand bad kane ka jaka ka don kumba lai lak square kilometre. Kane ka jaka ka kynthup ruh ka jaka khappud kaba 6300 km kaba iasyndah bad ka China, Nepal, Bhutan, Myanmar bad Bangladesh.
U Air Officer Commanding in Chief (AOC-in-C) jong ka Eastern Air Command mynta u dei u Air Marshal SP Dharkar.
Ka Eastern Air Command ka la ioh jingithuh kum ka No. 1 Operational Group ha ka por ba la sdang ia ka ha ka 27 tarik u Jymmang 1958 bad ha kane ka por, ka treikam na Ranikutir ha Kolkata kum shi bynta ka jingpyniar ka Sorkar ia ka jingpeit ia ki jaka khappud ha ka thain mihngi. Ia ka Operational Group la kyntiew sha ka Command ha ka 1 tarik u Nohprah 1959, la treikam na Fort William, Kolkata bad u Air Vice Marshal KL Sondhi u la dei u Air Officer Commanding-in-Chief uba nyngkong jong ka Eastern Air
Command. Hadien ka thma Indo-Chinese ha u snem 1962, la rai ban sdang ia ka Command kaba pura ha Shillong. “Samareshu Parakram” (Ka jingshlur ha ka jingiakhun) ka dei ka nongrim jong ka EAC bad kane ka pynshlur ia ka ban ialeh pyrshah ia ki jingeh kiba wan ha ka jingwad ia ka jingjop. Ka Air Command ka pyndonkam ia ki jingdon jingem jong ka IAF kum ki lienguin iakhun, ki liengsuin kit jingkit bad ki helicopter ha ryngkat kiwei kiwei ki tiar iasiat na sla khyndew bad ruh ki rynsan ai jingkyrshan ban pynthikna ka jingshngain ha ka suin ha ka thain mihngi. Kine baroh ki dei kiba la khreh lypa ban pynbeit
ia kano kano ka jingeh bad la don ki jingpyrshang na ka por sha ka por ban pynthikna ka jingkloi ban rung ha ka jingialeh. Shuh shuh, ia ki liengsuin bunsien la pyndonkam ha ki kam kiba iadei bad ka jingai jingshakri ia ka imlang sahlang haba don ki jingjia lynshop ki bor ka mariang, ka jingkit ia ki riew paidbah kiba sah ha ki jaka kiba jynjar ban poi bad ruh ban leit kit ia kito kiba la khlad noh.
Ka command ka don lai tylli ki bynta treikam – ki operation, ki jingmaramot bad ki jingpyniaid kam. Ki don ki por ba ki nongpynher liengsuin ki trei na ki Advance Landing Ground (ALG) ha kaba ka jingjrong jong ka lynti pynher liengsuin ka long tang kawei na ki lai pawa ba donkam. Kane, ha ryngkat ki jingeh kiba wan na ka mariang ka mut ba ki nongpynher liengsuin bad ki nongbatai lynti ia ki, ki dei ban long kiba la kham tbit ha ka kam. Ki briew bad ki kor ha kane ka jaka ki dei kiba hap ban sei lut ia ka bor bad ki sap.
Ka Indian Air Force (IAF) ka la trei ha ki kam Humanitarian Assistance and
Disaster Relief (HADR) ha ka jingioh jingtip kaba kynsan ban pyllait im ia ki briew jong
ka thain shatei lammihngi haba don ki jingeh. Kine ki kam ki long kiba iar bha bad ki
shong ha ka jinglong jingman jong ka por katkum ka jinglong jong ki jingjia lynshop ki
bor ka mariang kum ki jingshlei um, u jumai, ka jingsahkut ha ki surok, ki jingkulmar ha
ka imlang sahlang, ka jingduna ha ki mar ba kongsan bad ruh haba don ka jingsahkut ki
nongjngoh kai Ka IAF ka dei beit kaba nyngkong ban wan ai jingiarap bad kaba pyllait
im ia ki briew da kaba wanrah ia ka jingiarap na suin. Baroh ki liengsuin bad ki
helicopter jong ka ki trei baroh shi sngi ha kano kano ka sngi bad la phah ia ki sha ki
jaka ba shem jingeh katkum ki jingdonkam jong ka por. Ka long kum ka jingshai jong ka
jingkyrmen na suin haba shah tap ha ki lyoh kiba dum jong ka jingkut lad bad ka
jingartatien.
Ka thain shatei lammihngi jong ka India ka dei ka jaka kaba itynnad bha bad ruh
kaba bun ki jingdon jingem ba ai ka mariang bad ka long ruh kawei na ki jaka kiba shah
lynshop bha ha ki bor ka mariang. Kine ki jinglynshop kum ka jingshlei um bad u jumai
ki la kham bun ha kine ki shiphew shem ba la dep bad ha kine ki por, bun ki briew ki
donkam ia ka jingiarap. Shuh shuh, ka jingma na ki jinglynshop ki bor ka mariang ki dei
kiba lah ban pyniasoh bad ka jingkiew ka jingbun briew, ka jingkylla jaka sor, ka jingwan
ki karkhana, ka jingjulor jong ka mariang bad ka jingkylla ka suinbneng.
Watla ki bun ki kynhun kiba ai jingiarap, hynrei ka jingiatreilang na ka bynta ka
HADR ha ka thain shatei lammihngi ka dei lyngba ka IAF, ka Indian Army, Border
Roads Organisation, National Disaster Response Force (NDRF), State Disaster
Management Authority (SDMA) bad ka Airports Authority of India (AAI). Baroh ki rai kiba
kongsan ki wan hadien ki jingiamir jingmut bad kine ki kynhun. Kane ka jingiatrei lang
bad ka jingpynkhreh ka plie lad ia ki kam ba hap pyndep bad ka jingseisoh jong ki
sienjam.
Kum ban shu kdew, ha une u snem ba la dep, ha ki bnai Jymmang – Jylliew 22,
ka IAF ka la hap ban shimti ia ka kam HADR ban pynkit da ki liengsuin ia ki briew na ki
thain jong ka Assam bad Meghalaya bad ruh ban pyllait im ia ki briew kiba la sahkut ha
ki steshon rel ha Assam. Ka jingjur u slap ha ka thain Dima Hasao ka la wanrah ia ka
jingtwa khyndew, ka jingjulor ki surok, ki jingkieng rel bad ka jingtap um ia ki lynti rel
kaba la ktah bha ia ka jingim jong ki briew. Ia ka kam HADR la sdang ha ka 15 tarik u
Jymmang bad ka IAF ka la tam palat 100 tylli ki jingpynher lienguin ha ki sngi ba bud da
ki An-32, ALH, Mi-17 bad ki Chinook. Ia ki tiar ai jingiarap la kit na Guwahati bad Johrat
sha Silchar da ki An-32. Hadien kane, la kit ia kine ki tiar da ki Mi-17 bad ki Chinook
helicopter sha Haflong bad ruh sha ki shnong kiba shah ktah ha ka jingshlei um kum ka
Khepre, Hajadisha, Laisong, Harangajao bad Hajaichak. Ka IAF ka la kit palat 300 ngut
ki briew bad ka la kit bad pynhap 5,00,000 kg ki tiar ai jingiarap ia ka Assam bad 21,000
Kg ia ka Meghalaya.
La pyllait im 474 ngut ki briew na ki jaka ba don jingma bad la pynkit ia ki sha ki
jaka ba shngain bad la pynkit ruh jan 75000 kg ki tiar ai jingiarap kiba kynthup ia ki mar
bam sha ki shnong ba jynjar ban poi bad kane ka la ai jingiarap bha ia ki briew. La
pynher liengsuin ban peit ia ki sainar bording ban pynthikna ka jingwanrah biang ia ka
bording sha ki jaka ba shah ktah. Ha u Risaw 2022, ka ‘Eriong Sitrang’ ka la iaid sha ka
thain shatei lammihngi bad khamtam sha Tripura. Ka IAF ka la pynkit san tylli ki kynhun
NDRF bad 24 ton ki tiar HADR sha Agartala da ka liengsuin C130J ‘Super Hercules’ ia
kaba la pynher baroh shi miet hapdeng ka jingjur u slap.
Ka IAF ka ieng skhem ha ka jingthmu jong ka ban long ka nongiarap ba
nyngkong bad ka nongpyllait im ia ka thain shatei lammihngi. Ka ieng skhem ha ka
jingthmu ban ai ka jingshakri kaba bha tam ha kaba iadei bad ka ‘Har kaam, Desh ke
Naam’ bad ka jingkut jingmut kaba skhem jong kaba paw ha ka nongtim jong ka kaba
ong ‘To touch the sky with glory’. Ia ka Eastern Air Command la sdang ha ka jingiakhun
bad ka la kiew shaphrang lyngba ki jingiakhun. Kawei na ki atiar jong ka Indian Air
Force; Eastern Air Command (EAC) ka peit ia ki kam ha ka jaka kaba heh. Kan dang
bteng ban long kaba paw shai hapdeng kiwei kiwei ki Command katba ka dang iada ia
ki jaka khappud jong kane ka ri kaba khraw.
Katba ka Indian Air Force kaba khlain ka rakhe ia ka lyngkhuh dap snem, u Air
Officer Commanding in Chief (AOC-in-C) jong ka Eastern Air Command Air Marshal SP
Dharkar u la kyntu ia ki shipai ba kin pyndonkam bha ia ki jingdon jingem bad ban trei
ban kyntiew ia ka IAF bad ka ri sha ki kliar kiba thymmai …“Touch the Sky with Glory “.