Ka jingïalehkai phutbol na ka bynta ki khynnah shynrang bad kynthei kaba la tip kum ka “Chief Minister District Level U-12 Open Football Tournament 2023”, ba la pynlong da ka ophis jong u District Sports Officer, West Jaiñtia Hills District, yn pynlong ha madan Kiang Nangbah Stadium Dongmihsngi, Jowai naduh ka 8 tarik mynta u bnai.
Na ka bynta ka prokam jong kane ka lympung ha ka 8 tarik ka jingïakhun Semi Final ha ka liang ki kynthei ka St. Dominic H.S School (Laskeiñ Block) ka ïakhun pyrshah ïa ka Amlarem Govt. L.P School (Amlarem Block) bad ka Mukhla Grassroot Centre (Thadlaskeiñ Block) pyrshah ïa ka Moosachram Govt. L.P School (Namdong Block).
Ha kane ka juh ka sngi ha ka liang ki khynnah Shynrang ka Padu United A (Amlarem Block) kan ïakhun pyrshah ïa ka Namdong Sports Club A (Laskeiñ Block). Ka Ummulong Grassroot Center (Thadlaskeiñ Block) pyrshah ïa ka Laskeiñ Sports Club A (Laskeiñ Block). Katba ka jingïakhun phainal kan long ha ka 9 tarik u Jymmang.
La ïathuh ba ïa kane ka lympung “Chief Minister U-12 Open Football Tournament 2023” la pynïakhun ha la ki jong ki jong ki Block bad ki kynhun ba jop kin ia kynduh ha nongbah Jowai, katba kiba jop na ka District Level kin leit ban mihkhmat pat sha ka State Level.