Ka Seng National People’s Party kadei kawei na ki seng ba kiew sted bha ha kane ka jylla bad lah ban ong ba kadei na ka nongrim ba skhem ba la buh da u Myntri Rangbah barim ka jylla, u Purno Sangma uba dei ruh u speaker ka Lok sabha jong u snem 1996-98 bad u kpa jong u Myntri Rangbah Conrad K.Sangma.
Kane ka seng ka la khring shibun ki nongïalam bad ki MLA sha lade bad ha kane ka taiew ruh la ioh ban pynrung sa 3 ngut ki MLA jong ka seng Congress kiba kynthup ia u Bah Charles Marngar MLA ka Mawhati Constituency, Bah Celestine Lyngdoh MLA ka Umsning Constituency bad u Bah Gabriel Wahlang MLA ka Nongstoin Constituency.
Halor kane ka jingbam jakhluit kine ki 3 ngut, ka la pynlyngngoh ia ki paidbah bad ki la buh ruh ka jingkylli, hato kane kadei ka jingstad jong u Myntri Rangbah ban khwai ne ka don ka jingsngewiapher jingmut bad ki nongïalam ka Congress. Don ruh kiba ong ba kitei ki MLA ki kwah shuki bad khwan myntoi bad kam ba ki rung NPP na ka bynta ban ioh ia ki kam pynroi ha ka Constituency.
Kum ban shu pynkynmaw, ha kine ki snem ba la synshar da ka NPP, 8 ngut ki MLA kiba la phet na ki seng bapher bapher bad rung ha ka NPP ki la liem noh ha ka elekshon ba bud kaba ki iakhun na ki konstitwensi jong ki.
Kitei ki 8 ngut ki kynthup ia u Martin M Dango uba dei u MLA ka 35 Ranikor Constituency (South West Khasi Hills District) bad u la phet na ka seng Congress sha ka Seng NPP ha u snem 2018 hynrei ha ka jingiakhun elekshon shiteng samoi u la liem noh u Pius Marwein na ka seng UDP. U Kimfa Sidney Marbaniang na 33-Rambrai Jyrngam Constituency (West Khasi Hills District) u la phet na ka seng Congress sha ka Seng NPP bad liem noh ha u Independent candidate, u Remington Gabil Momin ha u snem 2023, u Mohendro Rapsang na 18 West Shillong Constituency u la phet na ka seng Congress sha ka Seng NPP bad khyllem noh ha u Bah Paul Lyngdoh na ka seng UDP ha u snem 2023, u Bah Hamlet Dohling na 22 Mylliem Constituency u la phet na ka seng PDF sha ka Seng NPP u la khyllem noh ha Ronnie B Lyngdoh na ka seng INC, u Bah Jason Sawkmie Mawlong u la phet na ka seng PDF bad iasoh bad ka NPP hynrei u la liem noh ha u Celestine Lyngdoh na ka seng INC, u Bah Samlin Malngiang uba la mih na ka seng HSPDP bad leit iasoh bad ka NPP hynrei u la liem noh ha ka elekshon ba bud pyrshah ia u Bah Synshar Kupar Roy Lyngdoh Thabah (UDP), u Teibor Pathaw uba la mih na ka seng UDP bad iasoh bad ka NPP hynrei ma u ruh u la liem noh ha ka elekshon ba bud pyrshah ia u Bah P.T Sawkmie, bad u Bah Macdalyne Sawkmie uba la mih na ka seng bad leit iasoh bad ka seng NPP phewse ka ka thong jong u kumba angnud kam shym la urlong namar u la liem noh ha ka elekshon ba bud pyrshah ia u Bah Mawralborn Syiem.
Hato ia kine 3 ngut ki paidbah ki don shaniah bad kin dang ioh ne em ia ka jingjop ha ka elekshon kaba bud namar katkum u soh, bun ki MLA kiba phet seng bad leit iasoh sha ka NPP ka lynti iaid jong ki ka la kut noh. Haba phai na ka jubab bad jingkynthoh jong katto katne ki nongïalam, u Bah P.N Syiem u la ong ba kane kadei ka kam rangbah bad kaei kaba ki leh ki la don ka jingsngewthuh, na ka liang u Bah Vincent Pala President ka Congress u la kynnoh ba kadei ka jingkhwai pisa jong ka seng NPP bad na ka liang u Bah Mawralborn Syiem u la ong ba kane ka jingphet seng, ka jingkhylliap lama ban iasoh lang tang kum kawei ka seng (merged) kam dei shuh kaba thymmai hynrei ka la long naduh ki por kiba mynshwa bad u la ong ba kane kam don jingsngewpher ei ei bad u burom ia ka jingjied jong ki briew.