Ka krem Mawjymbuiñ ha Mawsynram mynta ka la kylla long ka mat kaba heh kaba la poi ruh haduh kiwei pat ki jylla. Ha kine ki khyndiat sngi, ka rai jong ka Dorbar shnong Mawsynram, ka la mynjur ban ym shah ba kino kino ki jait niam ba kin pynkylla jaka mane blei ia ka jaka jngohkai pyrthei bad la don ruh katto katne ki riew paw khmat ka jylla kiba la ia mynjur lang kynthup ruh na u Myntri ba khmih ia ka Tourism, Bah Paul Lyngdoh.
Na ka liang ka seng BJP Meghalaya, ka don la ka jong ka jingsngewkhia halor kane ka mat, hynrei ki ong ba ia mynta ki hap ban sngapjar namar ka don hapdeng ka jingbishar.
U Arnab Das uba dei u nongaiktien ka BJP (Meghalaya) u la ong, “ki riewngeit jong ka niam Hindu ki la ju pynlong ka jingduwai ainguh da ki snem ha katei ka krem. Hynrei, ia mynta kane ka bynta ka la don ha ka kti jong ka ïing bishar bad ngi dei ban ap ia ka jingbishar ba khatduh jong ka īing bishar ba don burom. Ngi don ka jingngeit ha ka jingstad jong ka ïing bishar bad jingrai kan long kaba pynhun lang ia ngi”.