U SDO (Civil), Amlarem Sub-Division, mynta ka sngi ula pynmih ia ka hukum ba la shah ia ki riewngeit Hindu ban pyndep ia ka jinglehkmen ne ka rakhe ia ka lehniam Puja bapher bapher kiba hap ban pyndep hapoh kine ki bnai ha shnong Dawki.
Katkum ka shithi ba la phah sha u Secretary ka Sarbamangala Kali Mandir Durga Puja Committee 2021 kaba don ha Dawki ki bor pyniaid Sub-Division kila shah bad ai bor ia ki ban pyndep ia kane ka jinglehniam Durga Puja ka ban sdang naduh ka 11 tarik haduh ka 15 tarik mynta u bnai bad ia ka Laxmi Puja ha ka 20 tarik mynta u bnai katba ia ka Kali Puja pat la shah ban pynlong ha ka 4 tarik u Naiwieng mynta ka snem.
La bthah ia baroh ki riew ngeit Hindu ne kino kino ki briew kiba leit ne iashim bynta ha kitei ki jinglehniam Puja ki dei ban bud ryntih ia ki kyndon (Protocols) kiba la buh da ka sorkar. Lada lap ia kiba pynkheiñ yn pynshitom katkum ka aiñ.
Katkum ka hukum la khang bang pyndonkam ia ki kor pynsawa (PA System) palat ia ka 10 baje mynmiet. La khang ruh ban pynbthei ia ki bomkala ha ki jaka paidbah ne ha ki lynti iaid kjat bad ym shah ban die ia ki jingdih pynbuaid ha jan ki jaka ba don ki pandal Puja.