Ka National People’s Youth Front (NPYF), West Jaiñtia Hills District kala dep ban aiti da ka dorkhas ha u Myntri Rangbah duh ka jylla u Conrad K. Sangma ha kane ka 21 tarik u Jymmang halor ki mat (issue) kiba ïadei ban pynbha pynmiat ïa ki khun samla hapoh ka District.
Kine ki mat kiba ka seng kala pynsngew ki long ka jingdawa ban pynkloi ban khot Advertisement haka por kaba biang ïa ki kam hapoh ka MPSC bad DSC, khnang ba ki samla kim ym shah ktah ha ka rukom wad kam wad jam.
Kaba ar ka seng kala dawa na ka sorkar ban buh ïa ki jaka thoh exam (One Stop Examination Centre) hapoh ka District kiba kynthup ïa ka CUET, NEET, UPSC, MPSC, DSC bad kiwei de. Khnang ba ki samla kim donkam shuh ban leit thoh shabar.
Kaba lai shi bynta na ka jingpynkhreh ïa ka 39th NATIONAL GAMES ha u snem 2027. Ka NPYF West Jaiñtia Hills District kala dawa na ka sorkar ban buh ïa ka Sport Academy na ka bynta ki jait jingïalehkai Sports da kaba pynbha ïa ka Kiang Nangbah Stadium.
Kaba saw ka NPYF kala dawa ban buh ïa ka Drop-in Centre na ka bynta ki khun samla bad kane ka center ka long kyrpang ïa ki samla kiba don ha ka rta kaba 14-24 snem bad kiba donkam jingkyrshan na ka sorkar bad kane ka jaka kan ïarap ba kin ïohlad ban ïa phylliew jingmut lang ha ki bynta bapher bapher bad kumjuh ha ka liang ka koit ka khiah bad ki jingbatai ba bniah.
