Ha ka jingiadei bad ka jingrakhe ia Khristmas bad snem thymmai ka ban sa wan bad ban pynthikna ïa ka bit ka biang, ka koit ka khiah bad ka bha ka miat jong baroh ki nongshong shnong, u District Magistrate West Jaiñtia Hills ha ka hukum ba la pynmih katkum ka Section 163 BNNS u khang ban die bad ban thied ïa ki bom pataka ba la shna na shabar ri.
Ka jingdie ia ki bom pataka kan long tang lyngba ki nongkhaii kiba la ioh laisen bad dei ban pynthikna ba kine ki nongkhaii kin die tang ia kito ki bom kiba la ioh jingbit bad kiba iaid katkum ki kyndon jong ka Central Pollution Board. Katkum ka hukum la khang pyrshah ia ki bom kiba pynmih ia ka jingsawa kaba palat ia ka 125dB (AI) lane 145 dB(C) pk ha ka jingjngai kaba 4 meter na ka jaka ba bthei. La mana ruh ban pyndonkam ia ki bom ba la pyniasoh (Series crackers ne Laris) kiba wanrah ia ka jingbthei kaba heh, ka jingktah ia ka lyer, ka jingsawa bad ki jaboh jabain.
La mana ruh ban pynbthei ïa ki bom pataka hapoh 100 meter na ki Hospital, ki Nursing Home, ki Primary bad District Health care centre, ki jaka pule, ki Ïingkashari, ki jaka lehniam ne kino kino ki jaka kiba lah ban shah pynbna kum ki Silent Zone da ki bor ba dei peit.
La shah ban pynbthei ia ki bam pataka naduh ka por 11:55 Pm haduh 12:30 Am. Kane ka hukum kan treikam mardor haduh ban da kut ka jingrakhe.