Ka ALL JAIÑTIA MUSTER ROLL WORKER AND LABOUR UNION (AJMRW&LU) hapoh ka jingialam jong u ma Khroo L. Pariat kum u President ha ryngkat bad ka kong Dayoo Iakai kaba dei ka Vice President bad ki dkhot jong ka seng kila leit sha ka shnong Sohmynting ha kane ka 24 tarik mynta u bnai na ka bynta ban ai ka jingpynsngewthuh sha ki nongbylla halor ki skhim sorkar bapher bapher.
Kine ki nongbylla ki kynthup ia Minstari, ki nongshoh mawria, ki nongshongdie, ki nongkamai kali, ki Anganwadi, ki Helper, ki Muster Roll, ki nongtrei Mid Day Meal bad ki nongrep.
Ia ka jingialang ha kane ka sngi la pyniaid da u ma Jerry Anderson Suting uba dei u President jong ka AJMRW&LU Sohmynting Unit.
Na ka liang ka kong Dayoo Iakai kala ai ka jingpynshai halor ka Meghalaya Building and Other Construction Workers Board bad ia ki skhim jingmyntoi kiba kane ka Board ka lah ban pynioh ia ki nongtrei bylla.
La ioh ruh ka jingkren na u ma Khroo L. Pariat uba la ai ki kyntien sneng kyntien kraw bad ki kyntien ai mynsiem ia baroh ki nongbylla sngi ha kaba kumno kin lah ban ieng hala ki jong ki kjat bad ban don ka jingiakyrshan kylliang iwei ia iwei. U ma Pariat u la ai ka jingpynshai ha kaba iadei bad ki skhim sorkar kiba kynthup ia ka e-SHRAM bad ka PM-SYM bad ki jingmyntoi kiba lah ban ioh na kine ki skhim sorkar.
La ioh ruh ka jingpynshai na ka liang jong u ma Trust Tariang u nongtrei jong ka SBI, Jowai Branch uba la ai jingkren halor ka skhim Kisan Credit Card bad ruh halor ka jingiadei kam jong ki nongbylla bad ki Bank.
Ka jingialang kala long kaba ai jingmyntoi shibun ia ki nongbylla la pynpaw ki nongialam jong ka seng. Kham ha shwa la ioh ia ki kyntien pdiang burom na u ma Heibormi Lyngdoh.