Ka Deen Dayal Upadhyay Community College & Skill Development Centre Wahiajer, West Jaintia Hills District, Meghalaya ha ryngkat ka jingiatreilang ka Tnat Sorkar Horticulture, NEHU, Tura Campus kaba la sponsored da ka Horticultural Inputs ICAR-IIHR Bengalaru, ka la pynlong ia ka jingai jinghikai ia ki Nongrep ha ki jaitrep bapher bapher hynne ka sngi (20/09/2025) ha Skill Development Office, Wahiajer, ha kaba u Ma Sniawbhalang Dhar Deputy Chief Minister ka Jylla u ba long ruh u Local MLA ka thaiñ u long u kongsan.
Ha kane ka jingai jinghikai (training) ia ki Nongrep da ki spah ngut ki Nongrep ki la iawan shah hikai ha kane ka training kaba shisngi ha ryngkat ka jingiadonlang ki Samla pule (Shynrang bad Kynthei) jong ka Deen Dayal Upadhyay Community College & Skill Development Centre Wahiajer.
Ha kane ka sngi ka Program ai jinghikai ia ki Nongrep ka la sdang naduh ka por 10:00 AM, ha kaba la ioh ia ka jingkren kaba bniah bha shaphang ka kam rep ha ki jingrep kiba bun jait nalor u Kba, ka repsoh, reppai, Jhur, Krai, Kew bad kiwei de ki jait jingrep da u Professor C.P Suresh, Department of Horticulture, NEHU, Tura Campus.
Ha ka nohphai sngi la ioh ia ka jingkren bad ka sneng ka kyntu kaba sngewtynnat ia ki Nongwan training da u ma Sniawbhalang Dhar, Deputy Chief Minister ka Jylla uba long ruh u local MLA ka thaiñ. U ma Sniawbhalang haba kren ha kane ka sngi u kyntu ia ki Nongrep bad ia ki Samla Pule ha ki lain bapher bapher jong ka Deen Dayal Upadhyay College & Skill Development Centre ba kin pyndonkam hok ia ki jinghikai kiba ki la ioh na kane ka Skill Development College, la ka long ha ka Kam Khapsniuh, Fabrication, repsoh, reppai, repkba, Electrician, tailoring bad kiwei de ki jinghikai kaba ki la ioh. Nangta u ong kano kano ka kam ka sdang na kaba rit bad katba nangiaid ka kam kan sa ialam ia ki sha ka jingmyntoi ka bakhraw.
Kham hashwa ha kane ka sngi la ioh ia ka jingkren pdiang burom da u Dr. F.R. Sumer, Principal DDUCC bad ki jingruwai da ki Samla pule ka DDUCC, ka jingkren da u Professor. S. Umdor,Pro-Vice Chancellor, NEHU Shillong, na u Waheh shnong ka shnong Wahiajer ma Sanwotki Laloo bad na u Prof. C.P. Suresh bad ia ka Vote of thanks da u ma Wolnish Rymbai Programme Co-ordinator DDUCC, ha ka juh ka por uba pyniaid ruh ia ka jingialang bad shwa ban pynwai la sam ruh sha ki Nongrep ia ki Symbai jingthung bapher bapher.
Ha kane ka sngi la ia don lang ruh u Dr.Henry Lamin uba long u Founder jong kane ka Skill College Wahiajer, kong M. Sungoh Ex Vice Chancellor NEHU, MDC ka Wahiajer bad kiwei de ki kynrem ki lyndan kiba la shah khot sngewbha.
