Ka prokram ai jinghikai kaba shisngi hapoh ka NEH Plan halor ka rukom pynmih bad pynthymmai ïa u soh niamtra ne u Khasi Mandarin la pynlong da ka ICAR-Central Citrus Research Institute (ICAR-CCRI), Nagpur, ryngkat ka jingïatreilang bad ka District Horticulture Office, Khliehriat, East Jaiñtia Hills ha ka 11 tarik mynta u bnai ha shnong Mookynpad.
Ïa kane ka prokram la pynlong hapoh ka jingïalam jong u Dr. Dilip Ghosh, Director ka ICAR-CCRI, Nagpur. Haduh 53 ngut ki nongrep ryngkat ki riew shemphang ha ka kam rep soh bad ki bor pyniaid shnong ki la wan ban ïashim shitrhem.
Ïa ka prokram la sdang da ka jingpynrung kyrteng ïa ki nongrep, bud sa ka jingkren pdiang burom na u Stanly Roy Mulieh, Assistant Director jong ka Horticulture, Khliehriat, East Jaiñtia Hills District, Meghalaya uba la pynksan ïa ka jingpynbha ïa ka kam rep katkum ka juk jong ka jingstad saian na ka bynta ban pynbha shuh shuh ia ka jingrep ia u Sohniamtra ne uta uba ki khot u Khasi Mandarin.
Ka Kongsan ha kane ka sngi ka kong L. Lakiang, District Agriculture Officer, East Jaiñtia Hills District, ka la pynpaw ïa ki jingthmu jong ka sorkar ban kyntiew ïa ka jingpynmih ïa ki sohniamtra bad u la pynthikna ba kan bteng ïa ka jingkyrshan ïa ki nongrep lyngba ka jinghikai bad ka jingsam ïa ki mar rep ba donkam sha ki.
U Dr. Evening Stone Marboh u la ai ka jinghikai halor ki bynta kiba ïadei bad ka rukom rep ia kine ki jait soh bad ruh ban tip shaphang ki khniang jingpang kiba shait pynsniew ia kine ki jait soh, ha ka thaiñ shatei lammihngi jong ka Ri India.
U Wahehshnong jong ka shnong Mookympad u bah Tiewly Sutnga, u la ai ka jingkyrshan bad jingpynshlur ïa ki paidbah nongrep soh ba kin rep ïa u soh ñiamtra da kane ka buit thymmai ka Citrus Farming.
Ki nongiashim bynta ki la ioh jingmyntoi ruh na ka jingpyni kumno ban pynkhreh ia ki dawai pyniap tram kum ka Bordeaux Paste bad ka Bordeaux Mixture, ryngkat bad ki buit ot dieng kiba donkam ban pynneh pynsah ia ki kper soh kiba koit ba khiah.
Ha kane ka jingialang ki nongrep bad ki stad saian ka la ailad ban iasam jingmut, ki jingwatbniah bad ki lad ki lynti ban weng ia ki jingeh kiba iadei bad ki jaka rep.
La pynkut ia kane ka jingialang da ka jingsam ia ki tiar ba donkam sha ki nongrep ban pynsuk ia ka rukom rep ba bha tam ha ka rep ia u soh niamtra. Ka prokram ai jinghikai ka la long ka sienjam kaba kongsan ban ai mynsiem ia ki nongrep trai ri shaphang ka jingtip bad ki lad jingiarap na ka bynta ka jingrep ia ki kynja soh niamtra bad sohjew kaba neh.