Ka Seng Mih-Myntdu Community Social Welfare Association (MCSWA) mynta ka sngi ka 1 tarik u Kyllalyngkot 2024 ka la pynlong ia ka jinglehkmen bad jingpynsngewthuh ia ka prokram ai jinghikai na ka bynta ki General Duty Assistant bad ki Home Health Aide ha ka prokram kaba la pynlong ha DMF Building, Dienchynrum la wan ban iashim bynta lang da ka Additional Deputy Commissioner ka East Jaintia Hills District Khliehriat ka kong J.U Kharpuri ha ryngkat ka jingdon lang u District Medical & Health Officer ka East Jaiñtia Hills District, Khliehriat u Dr D. Shylla.
Ha kane ka sngi plie, la don ruh u Chief Functionary ka MCSWA, u A. J. Nongkynrih, u Skill Development Officer ka East Jaintia Hills District, u L.Suchen, Skills Manager Program MCSWA, ka kong R.Patlong, ka District Integrated Strategy na ka bynta ki jingpang HIV/AIDS, u S.Tariang, ki trainees, ki kmie ki kpa jong ki trainees bad katto katne ngut kiwei pat.
Haba ai jingkren sha ki paidbah kum u Kongsan ha kane ka sngi plie pyrda, la ong ka Additional Deputy Commissioner ka East Jaintia Hills District, ka kong Kharpuri ka la pynpaw ka jingsngewnguh ïa ka Mih-Myntdu Community Social Welfare Association (MCSWA), kaba la ai kum kane ka prokram ai jinghikai ka ban ïarap ban ai jingmyntoi ïa ki khun samla ka District. Haba kren halor ka Skills Training Program ba la pynbiang hapoh ka Skill Meghalaya ka la pynpaw ruh halor ki jingthmu jong ka sorkar ban ai kam ia ki samla ka jylla kiba la pyndep ia ka jinghikai jong ki halor ka sap kiba iadei bad ka koit ka khiah.
Haba kren halor ka jingbym don ki lad thung kam hapoh ka jylla Ka kong Kharpuri ka la kyntu ïa ki nongshah hikai bad ïa ki kmie ki kpa kiba la ïalum lang ha katei ka jingïalang ba kin long kiba iar ha ka jingpyrkhat wat haba ka ai mynsiem ïa ki kmie ki kpa jong ki nongshah hikai ba kin ailad ïa ki khun ki kti ban trei wat shabar ka jylla ruh. Ka la ong ruh ba ka jingtrei shabar ka jylla bad shabar ym tang ba ka ai kam ai jam hynrei ka kyntiew ruh ïa la ki jong ki jong ki sap ki phong.
Katba u District Medical & Health Officer, East Jaiñtia Hills District, Khliehriat u Dr. D. Shylla ha ka jingkren jong u ha kane ka prokram u la ban jur halor ka jingdonkam ban ai jinghikai ia ki samla ha ka kam ai jam wat haba u la shim ia kane ka kabu ban ai mynsiem ia ki samla ban shim kabu ia ka lad namar kan ai jingmyntoi ia ki ha kaba ioh ia ki lad kamai ha ki por ban wan.
Kiwei pat kiba la ai jingkren ha kane ka prokram ki kynthup ïa u Chief Functionary ka MCSWA, u A. J. Nongkynrih, u Skill Development Officer ka East Jaiñtia Hills District, u L. Suchen, Skills Manager Program MCSWA, ka kong. R. Patlong.
