Kum shi bynta na ka jingrakhe ia ka lyngkhu ba 50 snem jong ka jingioh jylla ba pura ka jylla Meghalaya, mynta ka sngi ka ophis jong u Executive Engineer ka Water Resources Department, East Jaintia Hills District, Khliehriat kala pynlong ia ka prokram ai jinghikai ia ka kynhun jong ka Water Users Association (WUA) jong ka Districgt ha District Agriculture Officers, Godown, East Jaintia Hills District, Khliehriat.
U Deputy Commissioner, East Jaintia Hills District, Khliehriat bah E. Kharmalki, IAS ula long u kongsan bad ha ka jingkren jong u, ula kyntu ia ki nongioh myntoi lyngba kane ka skhim na ki tnad treikam sorkar bapher bapher ba kin pyndonkam hok ia ka. Ula pynkynmaw ba ka long kaba donkam haduh katta ban pynneh pynsah ia ki jingpynmih jong ka mei mariang da kaba kin shim bun ki lad ki lynti kiba lah ban kynshew ia ki jingai jong ka mariang.
U bah Kharmalki ula kyntu jur ia ki briew ba kin pynmliem ban nang ban kynshew ia ka umslap da kaba thaw ia ki jaka pyllang um shapoh khyndew. U ong ruh ba dei ban nang ia ki lad ki lynti kumno ban pynkhuid ia ka um kaba ym donkam shuh. Ula kyntu ruh ba dei ban phai khmat de sha ka rukom pynmih bor ding lyngba ka bor jong ka sngi.
U bah R. Lyngskor, Executive Engineer, Water Resources Department ula ai ia ki kyntien pdiang burom ia baroh kiba la poi sha kane ka prokram, ha ka juh ka por ula kyntu ruh ia ki nongrep ba kin ai ka jingiatreilang bad ka tnad treikam jong u khnang ba ka jingpyntrei ia kane ka skhim kan long kaba jop bad kaba pynioh jingmyntoi ia baroh ki nongrep hapoh ka District.
Kiwei de kiba la ai jingkren ha kane ka prokram ki kynthup ia u ma D.B. Dhar, Assistant Director Agriculture (Agro), East Jaintia Hills District, Khliehriat, u A. Malang Horticulture Development Officer, East Jaintia Hills District, Khliehriat, u R. Tongper, J.E, Water Resource Department, East Jaintia Hills District.
Ha kane ka prokram u DC ula ai ia ka khusnam ryngkat bad ka song pisa ha ka TISHA Water Users Association (WUA) na Shnongrim namar ka jinglah jong ki ban treibha ia kane ka skhim.
