Ka tnad Community & Rural Development bad ka State Institute of Rural Development (SIRD) ha ka jingiatreilang bad ka Meghalaya Administrative Training Institute (MATI) mynta ka sngi kila pynlong ia ka jingai jinghikai (Orientation Programme) ia kito ki Junior Rural Development Officers (JRDOs) kiba dang rung thymmai sha ka kam.
Ia kane ka prokram la pynlong ha Yojana Bhavan, Main Secretariat, Shillong ha kaba u Chief Secretary ka jylla u bah D.P. Wahlang ula long u kongsan ha ka jingiadon ryngkat u Principal Seretary, C&RD u Sampath Kumar.
Haba kren ha kane ka jingialang u bah Wahlang ula ai khublei ia kine ki ophisar thymmai bad pynshlur ia ki ban long kiba trei shitom ha kano kano ka kam kaba ki shakri na ka bynta ka jingmyntoi jong ki paidbah nongshong shnong ka jylla baroh kawei. Ula pynkynmaw ba ka kamram ba kongsan jong ki ka long ban don ka jingiasyllok jingmut ba markhmat bad ki paidbah sha ki, kumta ki dei ban don ia ka akor ka burom bad ki dei ban nang ha ka ktien ka thylliej haba ki iakren bad ki briew. Ula ong ruh ba ki thaiñ nongkyndong jong ka jylla Meghalaya ki don ka jingpynmih kaba khlaiñ ha ka ioh ka kot ka jylla, kumta ka jingiasnohkti langjong kine ki ophisar bad ki nongkyndong kan kyntiew ia ka GSDP (Gross State Domestic Product) jong ka jylla.
U bah Wahlang ula kren ruh halong ka jingdonkam ban pynbiang ia ka jingioh (Financial Planning) jong kine ki Junior Officer khnang ba kan long ka jingiarap ia ki hadien ha bud ynda kila shongthait na ka kam.