Ka Mihmyntdu Community Social Welfare Association (MCSWA) kawei na ki seng treimon sngewbha, mynta ka sngi kala pynlong ïa ka prokram ai jinghikai pynsngewthuh ne ka “Village Awareness Programme” halor ka jingpang HIV/AIDS ha ka shnong Tyrshang kaba hap hapoh ka Thadlaskeiñ Block, West Jaiñtia Hills District.
Ïa kane ka prokram ai jinghikai sha ki paidbah katei ka shnong la kyrshan lang da ka Meghalaya Aids Control Society, Shillong bad kane ka prokram kala long shisha ka jingmyntoi kaba khraw eh ïa ki nongwan naduh ki longkmie bad ki khun samla shynrang bad kynthei, ha kaba kila ïoh shibun ki jingbatai ba bniah na ki riew shemphang.
Ïa ka jingïalang la pynïaid da u General Secretary ka Shnong ma M. Dkhar, la ïoh ka jingkren halor kane ka jait jingpang HIV/AIDS da ka kong Yoo-I Ka Bareh ka Programme Manager. Katba ka Dr. J.N. Shullai kala ai jingbatai bniah shaphang kane ka jait jingpang bad ki lad jingïada ban lait na ka jingïabit pateng na ka kmie sha ki khun.
Ïa ki kyntien ai khublei hashwa ban kut jong ka jingïalang la ïoh na ka kong Dayooshisha Ryngkhlem. Ki nongwan sha ka prokram kila pynpaw ba ki ïoh shibun ki jingmyntoi na kane ka jinghikai ban tip shaphang kane ka jingpang kaba la kynrei bha ha kine ki sngi ba mynta.