Ka Jaiñtia Students’ Movement (JSM) mynta ka sngi kala leit ban kynduh ïa ka Additional Deputy Commissioner ka West Jaiñtia Hills District ka kong B. Blah MCS, kum shi bynta ban buddien ïa ka shithi ba la dep ujor halor ka jingduh klass jong ki samla pule Class XI, ha ri Lum Jaintia kaba dang jia haduh mynta.
Ka seng kala leit ban pynkynmaw ïa ka shithi bala dep ban phah sha ka tnad pule puthi jong ka ophis DSEO bad kumjuh sha ka ophis u DC West Jaiñtia Hills District haka 05/05/2025 kaba ïadei bad ka Admission Class XI jong ka snem 2025-26.
Na ka daw ka jingduh rung klass da ki spah ngut ki kynnah kiba la ai jingtip sha ka JSM bad mynta kitei ki khynnah ki don hapdeng ka jingsyier mynsiem ïoh kumno kumno kin duh noh ban bteng ia ka jingpule jong ki.
Da ka mynsiem kaba sngewkhia ïa ki khynnah pule ka seng kala leit ban buddien biang ïa kane ka kam, da kaba kyrpad ïa ka sorkar ba kan thaw ki lad ki lynti ban pynïoh Admission ïa baroh ki khynnah pule hapoh ka Ri Lum Jaiñtia.
Ka seng JSM ha ka jingïakynduh bad ka kong Blah, MCS kala kular ban shimkhia ïa kane ka kam bad kan khot ïa ka jingïalang bad ka tnad kaba dei peit ïa kane ka kam, da kaba pynthikna ruh baroh ki khynnah pule kin sa ïoh ïa ki Admission hadien kane ka jingïalang.
Ha ka juh ka por ka JSM ka khot bad wer ïa baroh ki khynnah kiba dang duh Klas ba kin wan shakhmat ban iatreilang bad ka seng na ka bynta ban pynïoh ïa ka hok kaba long ka lawei ban saiñdur ïa ka jingim jong ki.