Ai jingkyrshan ka AHPUF ia ka pakhang shnong ki DS ka sor Jowai

Ka seng All Hynñiewtrep People United Front (AHPUF) ka ai ka jingkyrshan kaba pura ïaka pakhang shnong ba arsngi ia kaba la khot pynlong da ki Dorbar shnong ba don hapoh ka sor Jowai ia kaba la khot pynlong da ka Dorbar Shnong Tympang Iawmusiang.
 
Ka seng ka ong ba ym lah ban len ba ka don ka jingduh nong kaba jur na kane ka pakhang chong khamtam kiba shong iew shong hat bad wat kiba trei bylla ruh kumjuh hi namar ba ym ioh shuh ban trei ban ktah.  Hynrei na ka bynta ka jingbha jong ka shnong ka thaw khamtam kiba shnong basah hapoh ka sor Jowai bad ïa ka Rilum Jaiñtia hi baroh kawei ym banse hap ban iaishah ia kane ka jingeh. 

Te ka seng ka ai jingkyrshan pura ia kane ka pakhang shnong bad ka khot ka wer ruh ia baroh ki pait nongshong shnong jong ka Rilum Jaiñtia hi baroh kawei ba kin ia snoh kti lang bad kane ka pakhang shhong khnang ba kane ka jingthmu bad jingangnud jong ki pait nongshong shnong jong ka sor Jowai kan long kaba jop.
  
Lyngba kane ka kyrwoh ka seng ka pynpaw ka jingsngewkhia kaba jur namar badei naka daw ka jingkheiñ sting jong ka sorkar kaba pynlong ïa kane ka jingeh ha kaba ki  dorbar shnong kim banse ban shim ia kane ka sienjam ban pakhang shnong shi syndon.
 
Ka seng ka pynrem jur ia ka Jowai Municipal Board bad ïa ka sorkar MDA kaba lam khmat da ka NPP ïa ka jingbymlah jong ka ban pynioh ïaka jaka bret ñiut kaba pura. Ka seng ka kyntu ïa ka Sorkar bad ïa ka Jowai Municipal Board ba kan  wad lad wad lynti mardor ban weng noh iakane ka sohkyrdot, lym kumta ki jingeh kiba khraw kin dangmih shuh shuh ha ki sngi ki por kiban sawan.