Ka Khasi Jaintia National Union (KJNU) kan ai ka jingkyrshan kaba ratbah ia ka Jaintia Hills Trucks Owners Association (JHTOA) halor ka nongrim ban pyrshah ia ki kharkhana dewbilat ha rilum Jaintia. Ka KJNU ka la rai ban ai jingkyrshan ba ratbah ia ka JHTOA halor ka jingleh donbor ki kharkhana dewbilat bad ki iuh roit ia ka hok kamai kajih ki trai truck kiba dei ki trai ri trai muluk.
Kum ban shu pynkynmaw ba ka JHTOA ka la dawa ban pynneh ia ki Go-down ne ki jaka buh cement ha Byrnihat bad ban pyntreikam ia ka dor bai kit kumba la buh da ka sorkar Jylla kata ha ka dor T.7/- tyngka ha ka shi km hapoh ka jylla.
Ka JHTOA hadien ka jingleh kuman ki kharkhana dewbilat ban pyntreikam ia ka dor thymmai bad ka jingpynneh ia ka jaka buh cement hapoh ka jylla ka la khot ia ka jingiakhih naduh ka 20.11.2021 bad ka dang iaid haduh mynta.
Khatduh khatwai ka seng ka ai ka kti mon kti ka diang ia ki nongialam jong ka JHTOA ba kin iai dawa haduh ban da ioh ia ka hok kumba la buh da ka sorkar jylla bad ka seng ka kyrpad ruh ia ki para doh para snam jong ngi ba kin ai ka jingkyrshan ia ka JHTOA pynkut ka kyrwoh na u Chemi Phawa.