Ka tnad District Disaster Management Authority (DDMA), East Khasi Hills District lyngba u Deputy Commissioner & Chairman DDMA kala pynmih ïa ka jingmaham paidbah mynta ka sngi ha kaba ïadei bad ka jingjurslap, ka jingbeh lyer bad ka jingtied u pyrthat ha kine ki sngi ban wan.
Kumta la bthah ïa ki nongshong shnong jong ka District ba ki dei ban khmih bad pynskhem bha ïa ki tiar ki tar kiba lah ban shah rong ha ka lyer kum ki thup dieng, ki tin sop lane maw-it ba shong synjor, ki tin/sop, theh ñiut, ki sign board bad kiwei kiwei ki mar kiba lah ban shah rong ha ka por ba jur lyer. Lada ka jingba leilieh ka long kaba jur bad neh slem kan bha shibun ban nym pyndonkam ne ban pynmeh ïa ki tiar elektrik kum ki mobile, isteri, radio, telebision bad kiwei kiwei ki tiar kiba pyndonkam da ka bor elektrik.
La bthah ruh ïa ki Nong shong shnong ba ki dei ban long kiba phikir ban ïada ïalade namar ka jingshlei um ka lah ban jia hadien jong u lapbah khamtam ha ki jaka kiba don harud jong ki wa bad ki wanduid.
La kyntu ïa ki paidbah ban kiar na kaba jam ïa ki wanduid, ki wahbah bad ki kshaid ha ka por ba jur slap. Phim tikna ïa ka bor jong ka bad ka um kaba jyndong ban tuid stet ka lah ban pynkyllon ïa phi.
La mana ban ym tur ne niah ïa ki kali haba don ka jingshlei um bad kiar na ki post electrik ban lait na ka jingshah bat ha ki bor electrik. Na ka bynta kino kino ki kam ba kyrkieh ki paidbah kin sngewbha ban phone ha ka District Emergency Operation Centre, DC’s Office, East Khasi Hills District, Shillong lane ha ki Office jong ki Block Development Officer jong ka thaiñ bad lah ruh ban phone ha une u Number: 2225289/ 2502094.