Ka Office District Planning Officer, East Jaiñtia Hills District, Khliehriat mynta ka sngi ka la pynlong ia ka prokram pynsngewthuh paidbah halor ka phang ‘Meghalaya Right to Public Services Act, 2020, ia kaba la pynlong ha NIC Conference Hall ka ophis u DC, East Jaiñtia Hills District.
Ki riew shemphang na ki tnat treikam bapher bapher kynthup na ka District Disaster Management Officer, East Jaintia Hills District ba la ai jingkren da u bah D. Lyngdoh, na ka District Informatics Officer, East Jaiñtia Hills District, la ai jingkren da ka kong I. Rymbai, kumjuh u bah M. Sohkhlet uba dei u Sub-Inspector of Supply, u bah R. Pohren u E-District Manager kila ai jingkren halor ka phang kaba iadei bad ka Meghalaya Right to Public Services Act, 2020.
Ha kane ka prokram la pynshai sha ki paidbah ba kane ka aiñ ka shah ia ki riew paidbah ban ai kano kano ka jingujor pyrshah ia kino kino ki sahep sorkar jong ki Department bapher bapher hapoh ka jylla sha ka Meghalaya Right to Public Services Commission lada kim ioh ia ka jingshakri kaba biang na kitei ki ophisar sorkar.
