Ka Office jong u District Transport Officer, East Jaiñtia Hills District ha ka jingïatrei lang bad ka District Administration, East Jaintia Hills District mynta ka sngi ka la pynlong ïa ka Awareness programme ha ka jingïadei bad ka jingpynbha ïa ka jingkieng Ri-Manar kaba don ha shnong Samasi kaba hap hapoh ka Sutnga-Saipung Block.
Ha kane ka prokram la ïadon lang u District Transport Officer (DTO), East Jaiñtia Hills District, ma P. Laloo, Motor Vehicle Inspector (MVI), bah H. Dkhar, Enforcement Inspector, bah K. Tynsong, Junior Engineer, Public Works Department (PWD), NEC, Sutnga, ma L. Shadap, Daloi Elaka Sumer, ma K. Mannar, ki Waheh Shnong bad ki nongshong shnong.
U bah H. Dkhar ha ba ai jingkren ula pynpaw ïa ka jingsngewkhia halor ka jinglong jingman bad ka jingsdang long synjor jong kane ka jingkieng, ula buh ka jingkyntu ïa ki nongleit nongwan ba ki dei ba kin long kiba husiar bad ban kitkhlieh ruh ïa ka jinglong jingman jong kane ka jingkieng. Ula kyntu ruh ïa ki nongñiah kali ba kin kiar na ka jingkit palat pud khnang ban lait na kino kino ki jingjia ba sngewsih.
U bah Dkhar ula pynpaw ruh ba kane ka jingkieng ka dei u budlum jong ka ïaid ka ïeng jong kane ka thaiñ, kumta u kyntu ïa ki bor ba dei peit kynthup ïa ka Transport, ka PWD bad ka Police Department ban long kiba shimkhia lang ban ïada ïa kane ka jingkieng na ka jingjulor.
Kiwei de ki ba ai jingkren ha kane ka jingïalang pynsngewthuh paidbah ki kynthup ia u bah K. Tynsong, u Daloi ka Elaka Sumer ma K. Mannar, u J.E ka PWD u ma L. Shadap, ma B. Pasleiñ, ba dei u Waheh Shnong ka Samasi, u ma N. War, Waheh Shnong ka Mynthlu bad u bah H. Nongsiej Waheh Shnong ka Khremmyrsiang.
