Ka Jaiñtia National Council (JNC), ka ai khublei ia u Dr. Ricky AJ Syngkon ba dei ruh u MP ka Shillong Parliamentary Seat ba u la kloi ban wan jngoh da la ki jong ki khmat ia ka Eklavya Model Residential School kaba don haka shnong Jalaphet ka ba la sah teng mynta da ki bun bun snem khlem pyntreikam naduh ba la dep shna ia ki building.
Kane ka jingpynsahteng ia kum kine ki jaka ai jingstad ka long kaei kaei kaba pynduh nong ia ki paidbah, ia ki khynnah pule bad ruh ia kiba wat kam wat jam, ka long ka jingduh nong ruh ia ki khun samla kiba thrang ban pule hynrei kim ioh lad ban pule, bad ruh ka long ka jingpynsepei ia ka jaka kaba ki trai jaka ki la ai sngewbha da ka jingkhmih lynti ba kane ka school kan trei kam hynrei haduh mynta kam pat trei kam satia.
Kum ban shu pynkynmaw ka JNC ka la juh phah ruh ia ka dorkhat jong ka ha u snem ba la dep na ka bynta ban kyntu bad ban dawa na ka sorkar jylla ban pyntreikam noh kloi kloi ia ki residential school bad teachers training centre ki ba dang sahteng khlem pyntreikam haduh mynta kiba don ha East Jaintia Hills District, hynrei na ka liang jong ka sorkar pat ym don jubab haduh mynta ia kine ki Residential school wat haba lah dep shna ia ki building ruh la ong u Wanshwa Suting GS JNC-CEC
Hynrei lyngba ka jingwan jngoh jong u Dr. Ricky Syngkon ba dei ruh u MP na ka Shillong Parliamentary ia kane ka EMRS kaba don ha ka shnong Jalaphet ha ka 03.09.24, ka seng ka kyrmen skhem bad khmih lynti ba kine ki Residential School bad Teachers Training kin trei kam noh kloi kloi na ka bynta ka jingmyntoi u paidbah ba bun ba lang bad khamtam ia ki khynnah pule.
Ka JNC ka kyrpad ruh ia u MP ba don burom u Dr. Ricky AJ Syngkon ban buddien ia kine ki project ba dang sah teng bad ban wad ruh iaka dawbah dawsan ba balei lah shu ieh khunswet kumne khnang ba kin lah ban treikam noh haki sngi ki ban sa wan. Lada ka kam ka long tang ban pynhun iaki contractor naka liang ka seng kam sngew lah ban pdiang da lei lei ruh, pynkut u Wanshwa Suting GS JNC-CEC.