Ka Labang-Nongphyllut Pangam- Raliang Council (LNPC), ka Seng kaba ialeh bad iai ialeh ban pynwan ia ka Thain Labang-Nongphyllut, Nongphyllut Dolloiship bad Pangam-Raliang, ha ka jingialang jong ka kaba la long hynne ka sngi (25/04/2022) ha Jowai, ka phah ka jingai khublei bad jingiaroh ia ka Khasi Student Union (KSU) Unit Lapangap bad ia ki Nongshong shnong jong ka shnong Lapangap ia ka jingieng skhem jong ki halor ka nongrim ba une u surok Lapangap-Khanduli u dei hapoh u pud u sam jong ka West Jaintia Hills District Meghalaya bad ym dei ban ailad ia ki bor District Karbi-Anglong Assam ban kam trai ia kane ka thaiñ.
Ha ka juh ka por ka LNPC ka Seng kaba ialeh bad iai ialeh ban pynwan ia ka Thain Labang-Nongphyllut bad Pangam Raliang ka thain kaba la kdiah jubor na ka Rilum Jaintia da ka Sorkar Assam ka don ryngkat bad ka KSU Unit Lapangap bad ki Nongshong shnong ka Lapangap ban ym aili ia ki bor District Karbi-Anglong Assam ba kin kam trai longhok nongkynti jong ki ia kane ka thaiñ.
Nangta la ong ruh ba ka Seng LNPC, ka dangap kmang ia ka jingwan ka Committee pynbeit pud ka Meghalaya bad Assam ia ka Thain jong ki bad ka Seng (LNPC) ka dawa tyngeh ba kane ka thaiñ ka dei ban wan hapoh u pud u sam jong ka Jaintia Hills kumba ki ju long naduh hyndai hynthai bad lada kane ka thain (Labang-Nongphyllut, Nongphyllut Dolloishi bad Panagam-Raliang) kam wan hapoh u pud u sam jong ka Jaintia Hills Meghalaya, ka Seng ha ryngkat ki Sengbhalang, ka Synjuk ki Rangbah shnong ka Rilum Jaintia, ki Elaka ka Rilum Jaintia kin pynlong ka jingiakhih kaba tyngeh bad ym tip shano kan ialam satang ka por ka ban iathuh, pynkut ka khubor bala phah da u ma Bernard S Shadap.