U Steve Jyrwa na ka jylla Meghalaya u la long u nongjop ne uba la ioh ban rah ia ka nam lahduh ha ka jingiakop shad ba paw jong ka Ri kaba la tip kum ka ka India’s Best Dancer 2024, ha ka jingiakhun kaba khatduh ne ka Grand Finale kaba la long ha kane ka sngi U Blei.
Ha ka jingiadei bad kane ka jingwan rah nam bad burom une u samla na Shillong uba 17 snem ka rta na ka liang ka seng All Hynniewtrep People United Front (AHPUF) lyngba u President jong ka u bah John Phawa, ka la khublei kyrpang bad ai ka jingiaroh ia u samla Steve Jyrwa bad kum juh ruh ka seng ka la kit bok kit rwiang ia une u samla ba un nangiaid shuh shuh sha khmat bad khamtam ban kdew lynti ia kiwei pat ki para samla jong ka ri bad ka jait bynriew.
Ha kane ka jingjop jong u Steve, u la ioh ban rah ia ka song pisa kaba 15 Lak tyngka kumjuh ruh ka kali maruti Swift, u Steve u la ioh ruh ka jingiaroh na ki khlur ka Bollywood ia ka sap shad kaba u don. U Steve u la shah khot ruh ban don bynta ha ka wei ka phlim Bollywood ka ban sa pynmih shen.
Ha ka Grand Finale u Steve u la pynliem ia kiwei pat ki hynriew ngut kiba kynthup ia u Harsh Keshri, Nextion, Nepo, Akanksha Mishra ka Akina bad u Aditya Malviya.
Ha katei ka jingiakop final ia u Steve la wan ban sakhi ne synranlang ia u da kiba ha ïing ha sem jong u na Shillong.
