Ka Jaiñtia Students Union (JSU) Jowai Circle, ka ai khublei ïa ki bor pynïaid District kiba la sngap ïa ki jingeh bad pynkynriah noh ïa kane ka tamasa Summer Jam sha ka jaka kaba kham biang. Kane ka rai ka pynthikna ba ki nongpang ha Civil Hospital Ialong kin ioh ia ka jingsumar khlem jingthut bad ba ka jingshngaiñ jong ki paidbah kan long kaba biang.
Ki Hospital ki dei ki Silent Zone hapoh ka Noise Pollution (Regulation and Control) Rules, 2000, ka aiñ kaba iarap ban iada ia ki briew na ka jingsawa jam kaba lah ban ktah ia ka koit ka khiah jong ki. Katkum kane ka kyndon, ym shah ban don kano kano ka jingsawa jam hapoh ka jingjngai kaba 100 meter na ka hospital, skul, ne ka ïingbishar. Ka jingthmu ban pynlong ia kane ka tamasa hajan ka Civil Hospital Ialong ka pynkheiñ ia kane ka ain, kaba ktah ia ka jingkoit jingkhiah jong ki nongpang bad ka jingai jingsumar ba kyrkieh.
Ka jingsawa kaba jam na ki tamasa rwai ka lah ban pynshitom ia ki briew kiba pang ha hospital. Ka lah ban pynthut ia ka jingjahthait jong ki, pynjur ia ka jingkhuslai, bad ban pynlong ia ki doktor bad ki nurse ban shem jingeh ban ai ka jingsumar kaba biang. Nalor kata, ka jingpynlong ïa ka tamasa kaba heh hajan ka hospital ka lah ban wanrah ïa ka jingkhapngiah, kaba pynlong ïa ki kali kit nongpang ban shem jingeh ban poi ha ka por kaba biang sha hospital. Kane ka lah ban buh ia ki jingim ha ka jingma.
Hadien ka jingkyrpad jong ka JSU ia ki bor pyniaid District, kumta la bthah ban pynkynriah noh ia ka jaka pynlong jong katei ka tamasa.
Ha ka juh ka por ka JSU ka kyrshan ïa ka jingpyrshang jong ka tnad jngohkai pyrthei ban kyntiew ïa ki sap ki phong bad ka kam jngohkai pyrthei ha Meghalaya. Ka kam jong ki ka long kaba kongsan na ka bynta ka jingroi jong ka imlang sahlang.
Ka JSU Jowai Circle kam pyrshah ia ki tamasa rwai, ki nongrwai trai shnong, ne ki jingialehkai pynbyrngia. Ka kyrshan ia ki sap ba tbit bad ki kam kolshor jong ka thaiñ, hynrei kum kine ki jinglehkmen dei ban pynlong ha ki jaka ba kim pynthut ia ki jingshakri kiba donkam kum ka koit ka khiah.
Ka seng ka ai khublei ia ki bor synshar shnong bad ki nongpyniaid ia ki jingialang kiba la sngap ia ki jingeh bad shimkhia ia ka jingdawa jong ka seng.
