Ka Synjuk Ki Waheh Chnong (KSKWC) Jowai ka pynpaw ka jingai khublei ia u Deputy Commissioner, West Jaiñtia Hills District, halor kane ka jingiatrei lang jong u na ka bynta ban pynbeit ia ki jingdawa dawa ban bun jong ka seng na ka bynta ka bha ka miat jong ka imlang ka sahlang jong ki nongshong shnong ka nongbah Jowai baroh kawei.
Ha ka juh ka por ka seng ka ai khublei kumjuh ia u Local MLA, ma Wailadmiki Shylla uba la ai sam ia kitei ki borti bret ñiut mynta ka sngi sha ki longïing kiba don hapoh ka Jowai da ka jingthmu ban wanrah ia ka khuid ka suba hapoh ka shnong ka thaw. Kumjuh ruh ia ka Jowai Municipal Board (JMB) kaba la leh shitom na ka por sha ka por ban leit lum ïa ki ñiut ki ñier lyngba ki nongtrei jong ka wat hapdeng jong ka khlam Covid-19.
Kumta Ka Synjuk Ki Waheh Chnong Jowai ka khot lang ia ka jingiatreilang baroh ki nongshong shnong ka sor Jowai bad kin long kiba lehkhuid leh suba namar ka long kaba donkam eh ha ka jingim briew da kaba kiar ruh na ka jingbret pathar ia ki ñiut ne ki jaboh jabaiñ kat shaba lap ba poi.
Ka Synjuk ha kane ka sngi kala dawa ruh na u DC ba dei ban phah pynmeh bording noh ia u wei u Post Light uba don hajan ka ophis DC ha Iawmusiang ula la lip da ki bun bnai mynta, khnang ba kan wanrah ia ka jingitynnad bad ka jingshngaiñ jong ka shnong Jowai hi baroh ka wei.
