Ha ka jingrakhe ia ka “World TB Day” hynne ka sngi ha Soso Tham Auditorium, Shillong, ka tnad National Health Mission ka Sorkar Jylla ka la rakhe ia kane ka sngi ha ka jingiadon lang ka Myntri ba khmih ia ka tnad ka Koit ka Khiah Dr. Ampareen Lyngdoh, ki Nongjop ia kane ka jingpang, ki doktor, ki nurse, ki samla pule, ki ophisar sorkar bad kiwei kiwei. Kane ka jingrakhe ka dei ruh shi bynta ban ai mynsiem ia ki briew kiba la mad ia kane ka jingpang bad ban pynshlur ruh ia ki jingsumar kiba la shimkhia ia ki nongpang.
Ha kane ka sngi la ai ruh ia ka khusnam bad ki syrnod sha 625 tylli ki shnong kiba la ïakhun bad kiba la lah ban iaineh na ka bynta ban pynduh jait ia kane ka jingpang. Nalor kata, la ai khusnam ruh ia ki District kiba la trei shitom bad trei shitrhem na ka bynta ban ïakhun ia kane ka jingpang.
Haba ai jingkren ha kane ka sngi, na ka liang ka Myntri ba khmih ia ka Tnad ka Koit ka Khiah ka la ong ba dang shen ka Sorkar ka la plie jingkhang sha ki paidbah ba kin pyndep ia ki test khlem jingsiew na ka bynta ban tip ia kane ka jingpang bad ha kitei ki program la lap kumba 823 ngut kiba la don ia katei ka jingpang.
“Ngi kwah ban iohi ba baroh ki shnong kin lah ban ïakhun bad pynduhjait jait ka kane ka jingpang. Ngi kwah ban pyntikna ruh ba ngi sumar ia kane ka jingpang ha ka rukom kaba dei bad pyntikna ruh ba ki jaka sumar baroh kin treikam ha kano kano ka por bad ha kano kano ka jaka” ong ka Dr. Ampareen
Ka Myntri ka pynshlur ruh ia baroh ki nongshong Shnong ka Jylla ba kin pyndep noh ia ki test na ka bynta ban pyntikna ba kane ka jingpang kam buhrieh hano hano ruh.
Nalor kata ka la pynshlur ruh ba kim dei ban tieng ia kane ka jingpang namar la don ki dawai bad ki jaka sumar ba paka “Ka jingpang TB ha kane ka juk ba mynta ka dei kaba lah ban sumar” pyntikna ka Myntri.
