-Haduh 15 lak kular ban ïarap thied jaka ïaka ophis treikam ka Kur-
Ka Lympung Lum Kur Dhar kaba don ïa ka moto “Ha ka kti U Blei Ban teh song ïa ka Kur” mynta ka sngi saitjaiñ 18 tarik u Kyllalyngkot 2025 kala ioh ban pynlong ïa ka ‘Dorbar Pyllun’ ha madan ialehkai jong ka shnong Mulieh, West Jaiñtia Hills District.
Ki kur Dhar na kylleng ki jaka ka Ri Khasi bad Jaiñtia kila wan sha kane ka jingïalang Kur, naduh ki riew rangbah, ki longkmie ki longkpa bad ki khun samla kila wan shitrhem ban ïoh ïakynduh lang kim shi para shisien shisnem.
Ïa ka jingïalang la pynïaid da u Chairman ma R. Dhar, President ka kur, la ïoh ka jingduwai na u ma D.B. Dhar, Advicer, la ïoh ka jingkren Pdiang burom na u Mewanhi Dhar. Kala don ruh ka jingkynmaw burom ïa ki Kur kiba la khlad noh da ka jingsngap jar kaba shiminit.
La ïoh ïa ka sneng ka kraw ïa ki khun samla da u ma Wansalan E Dhar, katba ka kong Roishan Dhar kala kren shaphang ki longkmie kiba la long shisha ki jingkren ai jingsneng ïa ki para Kur.
La pynshong shit shuh shuh ïa kane ka jingïalang da ki jingrwai bad ki jingshad na ki khun ka Kur kiba la wan ïashim bynta na kylleng ki shnong bapher bapher.
Kiba bun ki riew rangbah kiba la ai jingkren ha kane ka sngi kila buh ka jingkyntu kynpham ïa baroh ki para Kur halor ki ki mat ba donkam eh, kum ka jingïaieit ïatylli para kur, nalor ka jingïaleh ban rad dyngkhong na ka jingkynrei jong ki kam sniew kum ki jingdih pynbuaid bad u Drug uba la pynngop ïa kiba bun khun samla ka Ri.
La kyntu ruh ïa ki para kur Dhar ba kin long kiba don ka mynsiem jingïatylli lang kawei, da kaba kyntu jur ïa khun samla ban kiar na ki jingsniew ba bun jait khamtam ka jingpyndonkam bakla ïa ka Mobile Phone lyngba ki lad Social Media, ha ka juh ka por la kyntu ïa ki khun ka Kur ba kin pynleit jingmut nyngkong ha ka pule puthi namar ka long kaba donkam ïa ka lawei jong ka Ri bad ka jaitbynriew.
Ha kane ka sngi la sam ruh ïa ki khusnam sha ki khun samla kiba la pass bha ha ki examination bapher bapher kiba poi sha ka 75 % shaneng. ïa kine ki khusnam la da u kongsan ma Sniawbhalang Dhar bad u Symbud kongsan ma Damechwapaya Dhar.
Na ka liang u kongsan jong kane ka sngi uba dei u khun ka Kur Dhar uba la bat mynta ïa ka kyrdan Deputy Chief Minister ka sorkar jylla MDA-2 u ma Sniawbhalang Dhar ula pynpaw ka jingsngewkmen ban wan ïakynduh lang kumne shi para, khnang ban wanrah shuh shuh ïa ka jingïaieit bad ka janïasngew jan hapdeng ki para kur.
U ma Sniawbhalang Dhar ula pynsngew ba ka jingwan khnang jong u sha kane ka lympung ka long kum shi bynta ban ai mynsiem ïa ki para kur, ba kin don ka mynsiem jingïaieit, ka jingsngewrit bad ka jingtrei shitom ban ïoh kheit ïa u soh ka jingjop.
Ha ka juh ka por ula kular ban ïarap pisa haduh 15 lak tyngka na ka bynta ban thied jaka ban shna ïa ka ophis treikam jong ka kur, da kaba pynsngew ba u kloi ban ïatreilang bad ki para Kur na ka bynta ka jingbha jngmiat ka Kur Dhar.
La ïoh ruh ka jingpynsngew ïa ki Report na ki Zones, ka Report Kyllum na u General Secretary ka Kur ma D.S. Dhar bad ka jingïaphylliew jingmut lang hapdeng ki para Kur, katba ïa ki kyntien ai khublei la ïoh na u ma S. Dhar uba dei u Adviser bad ka jingnguhblei pynkut da u Shanborlang Dhar.
La pynshit pynsyaid ia ka sngi da ka jingïashim bynta jong ki khun samala ka Kur Dhar ha ka jingshad tynrai, ka jingshad group bad ki jingrwai.
