Ha ka 29 tarik u Jylliew (Sngi Saitjaiñ) ka Synjuk ki Rangbah Shnong, War Jaiñtia hapoh ka jingialam jong u ma Kolmen Pohshna uba dei u Advicer jong ka Synjuk ryngkat ki nongshong shnong jong ka thaiñ War West bad ki nongshong shnong ka Kudengrim kila mih paidbah ban leit jurib ia ki bynta jong u surok na shnong Kudengrim shaduh Kudeng thymmai, uba pyniasoh shaduh ka shnong Lamin, Sohkha ter ter.
Ia kane ka jingleit jurib la leh hadien ba u Contractor ba pyntrei ia une u surok u ma Khlur Pakma ula iehnoh shiteng por ia ka kam. Lada u Contractor u la trei ia ka kam la dei ban dep noh ha kine ki sngi ong ki nongialam ka Synjuk.
Na ka liang ki rangbah nongialam shnong kila pynrem jur halor kane ka jingpynsahteng ia une u surok, uba dei u bud lum ba kongsan jong ka roi ka par jong kane ka thaiñ.
Na ka liang ka Synjuk ki Rangbah Shnong War Jaintia kila buh por bad ong ba kane ka dei ka sien kaba khadduh ban kyrpad ia une u Contractor ban wan pynshna biang ia une u surok hadien ba la dep ban iakren la ar sien, lym kumta kin sa leit ujor noh sha ki bor ba halor bad wat sha ka ïngshari ruh.
Ha katei ka sngi ka Synjuk ka la leit ban jurib ruh ia ki bynta jong u surok na ki thain Lamin, Sohkha bad Kudeng, Nongbareh ha kaba la lap ba u surok u long uba sniew haduh katta katta bad la kyntu ia ki bor ba dei peit ban leh ia kaba donkam.