Hadien ka jingsngew sangsot ia ka jingeh kaba ki nongshong shnong jong ka nongbah Jowai bad ka ri lum Jaintia hi baroh kawei ki ia kynduh halor ka jingsah kut jong ki jaklia lane ki ñiut ha ki bynta jong ka Iawmusiang bad sha kiwei de ki bynta na ka liang jong uwei u rangbah uba kyrteng u ma Damewanhi L. Rymbai uba na ka shnong Moolamylliang, East Jaintia Hills District uba long ruh uwei na ki nongtrei mon sngewbha ha ki por ba mynshwa, mynta ka sngi u la wan ban ai sngewbha da ka krem Dewiong jong u kaba um shym la pyndonkam shuh sha ka Jowai Municipal Board (JMB) ba kan leit bret noh ia kine ki ñiut.
U ma Damewanhi u la pynshai ba ia kane ka jingthmu jong u, ula dep ban ia syllok bad ki bor shnong kiba la shah ba un leh ia kane ka kam. Kumta kum shi bynta ban tep noh ia katei ka krem dewiong jong u kaba jrong kumba 200 phut ei ei, kaba long ruh ka lad ban ioh pynkhuid noh ia kitei ki jakhlia kiba la kyllum lum rit ha nongbah Jowai.
Ia kane ka jingaisngewbha jong u ma Damewanhi la iasoi mynta ka sngi (20.4.2022) ha ophis treikam jong u Deputy Commissioner ka West Jaintia Hills District. Katkum kane ka jingiakut kane ka jingbret ñiut kan long shibnai bad hadien kata yn sa hap ban tep noh ia katei ka thliew.
Ha ka jingiadei bad kane ka jingkylluid mynsiem utei u rangbah na ka liang u Dr. H.H. Mohrmen uwei na ki riew rangbah ka nongbah Jowai, u la ai jingiaroh ia une u rangbah ba u la leh ia kane ka kam ym ban ioh jingmyntoi ialade hynrei ban pyllait ia ki paidbah na ki jingeh, khamtam ruh ban don kata ka khuid ka suba hapoh ka shnong ka thaw.