Ha ka sngi ba lai jong ka Dorbar Tlang ka KHADC, u MDC ka Langrin Constituency Bah Pius Marwein hynne ka sngi (24 Risaw 2025) u la wanrah sha ka Dorbar ia ka mat halor ka jingshah iehbeiñ ka Surok kaba na Wahkaji – Nongtnger-Mawthabah (South West Khasi Hills District) kaba hap hapoh u pud u sam jong ka KHADC.
U Bah Pius u la ong ba ka katei ka Surok ba la shna da ka KHADC da ki phew snem mynshwa la shu iehnoh khongreng khlem maramot shuh bad ka Surok kam long shuh ban iaid kali bad ki briew kiba don ha 11 tylli ki Shnong kiba iaid lyngba katei ka Surok, ki la hap ban iaid kjat da ki phew kilometar na ka bynta ban leit iew ne ban leit shim dawai. Shuh shuh u la ong ba ki paidbah ki shem jingeh namar ka KHADC kam leh ei ei wat hadien ba ki paidbah ki ju leit mih na ka por sha ka por ban kyrpad ia ka KHADC na ka bynta ban maramot ia katei ka Surok.
“Ngi tip ba ka Council kam don Skhim ban maramot ia ki Surok bad mynta ruh ka don hapdeng ka jingeh ha ka liang ka pisa tyngka” ong u Bah Marwein. “Lada ka Council kam lah ban leh ei ei ngi kyrpad ban aiti noh sha ka Tnad PWD. Ban maramot ruh ka eh ban ai sha ka PWD ruh ka eh, ngi kyrpad ia ka EC ban pyrkhat ban aiti sha ka PWD na ka bynta ban ngin ioh ia ki Skhim PMGSY”.
Haba jubab ia kane ka mat, u EM ba khmih ia ka Tnad Council Asset, Bah Pynkhrawboklin Kharjahrin u la ong ba ka katei ka thaiñ ka dei kaba don ia u Mar ‘Poh Khyndew (Uranium) bad lada aiti sha ka PWD kan wanrah ia ka jingma. Nalor kata, u la ong ba lada don ki lad ka Council kan ai NOC tang na ka bynta ban ai maramot ia ka Surok bad yn ban ai duh sha kita kiba pynmaramot namar katei ka jaka ka dei jong ka Council.
“Wat sngewthuh bakla” jubab u Bah Pius ba kdew u EM ba ka dei ka jaka ba don u Uranium. “Ka jingthmu ban pan maramot ka dei na ka bynta ka jingeh ki paidbah, leit jngoh ban tip ia ka jingiashem jong ki” ong biang u MLA Langrin.
Hadien katei, u EM u la ong ba ka jingwanrah ia katei ka mat ka long kaba dei bad kaba donkam. Ryngkat ka jingkular ba ka EC kan shimkhia bad iatai ha ka Executive Committee, la pynkut noh ia katei ka bynta.
