Lai ngut ki MLA na Rilum Garo kiba kynthup ruh ia u Myntri Sorkar u Rakkam A. Sangma, u Marthon J. Sangma, u Marcuise N. Marak ki la leit ban ai da ka Dorkhas ha u Myntri Rangbah ka jylla Conrad K. Sangma ban pynpaw ia ka jingangnud na ka bynta ban pynioh shuh shuh lane ban bteng ia ka lynti rel na Mendipathar sha Baghmara.
Haba ai jingkren, na ka liang u Rakkam Sangma u la ong ba kane ka thong kan sa urlong ha kano kano ka por lada kam dei lashai ruh kan don beit ka sngi ba yn sa pyntreikam. “Ngi la ai da ka Dorkhas ha ka kti jong u Myntri Rangbah bad ngi ngeit ba un iarap ban pynkren bad u Myntri ba khmih ia ka tnad rel (railway) jong ka Sorkar India.
U la iathuh ba ka lynti rel ka long kaba Kongsan haduh katta katta ha kaba kan iasnoh bad bun tylli ki ri kynthup ia ka Dhaka (Bangladesh) kaba dei ruh ka ri kaba kham jan na ka bynta ki briew na Rilum Garo ban leit lada ianujor ha Shillong bad Guwahati. U la kam ruh ba lyngba ka lynti rel kan kyntiew ruh ia ka kam jngohkai pyrthei ha kaba ki briew na Shathie jong ka dewbah Asia bad kiwei ki ri ki lah ban wan ha kane ka Jylla lyngba na Baghmara.
Haba kylli lada ailad ia kane ka Projek, hato kin don ne em kiba pyrshah “Ngam tharai ban don kiba ong em namar kane ka kyntiew ruh ia ka rep ka riang namar ka jaka jong ngi shane ka dei kaba mih shibun ki jait soh bad ki jait jhur” ong u Myntri.