Ka Sorkar Meghalaya lyngba ka Tnad Social Welfare, hynne ka sngi ka 11 Naiwieng 2025 ka la pynlong ia ka jingialang na ka bynta ban iathir halor ka jingshah ban beiñ ia ki Kynthei bad Khynnah ha ka Jylla ha kaba la ia don ryngkat da u Bah Paul Lyngdoh, Adviser Social Welfare, Agatha Sangma (Chairperson of the State Comission for Protection of Child Rights), S.P East Khasi Hills Bah Vivek Syiem bad kiwei kiwei.
Haba ai jingkren ha kane ka sngi, na ka liang u Bah Paul u la iathuh ba ka Tnad ka shimkhia shibun na ka bynta ban ai ia ka jingiada ia ki Kynthei bad Khynnah ha kaba u la kdew ruh ba dang shen la mih ka khubor ba shah kynnoh “Menshohnoh” ne “Nongaiksuid” ia kawei na ki longïing ha Pdeng Shnong Sohra ha kaba ka Tnad ka la leit mar mar hadien ba ioh ia katei ka khubor ban ialam noh sha Shillong na ka bynta ban pyntikna ba kin ioh ia ka jingiada kaba paka. Shuh shuh u la ong ba ka Tnad ka la leh shibun ki kam kynthup ruh ban kem ia ka jingkhaïi beaiñ ia u Drok bad ban ai ka hok ban iada ia ki Khynnah bad ki Kynthei. Nalor kata, ban wanrah ia ka jingshngain ha ka imlang sahlang, u Bah Lyngdoh u la ong ba ka jingangnud bad ka thong jong u ka long ba ki ki jait niam bad ki Balang bapher bapher, ki nongialam shnong ki dei ban iatreilang na ka bynta ban rat dyngkhong ia kum kitei ki kam sniew.
Katba na ka liang jong ka Agatha Sangma, ka la ban jur ba ki jingsniew ki kha roi man ka sngi hynrei pat duna ban pynlong ia ki Program ai jinghikai na ka POSCO na ka bynta kitei ki mat. Ka la ong ruh ba kum kine ki mat iakren, dei ban wanrah ruh sha ki skul bad ki shnong ki thaw. La ai jingmut ruh ba ia ki kynthei kiba leit trei, dei ban kham pynjynsur ka por trei na ka bynta ban wanrah ia ka jingshngain.
