Ki nonghikai SSA kiba don hapoh ka shatri ka Meghalaya SSA School Association ka la pyntip sha ki para nonghikai ba kin ia wan sha ka General Meeting ka ban sa long ha ka 21 tarik u nailur 2024, ha Riatsamthiah Commitee hall ban iatai iathir halor ki artylli ki mat jingdawa ki nonghikai SSA na ka sorkar.
Haba ia kren sha ki lad pathai khubor ha ka 13 tarik u nailur 2024 u President ka MSSASA u bah Aristotle Rymbai u la iathuh ba kine ki mat jingdawa ki long ban pynskhem ia ki nonghikai SSA kum ki nonghikai ba pura bad ban pynkiew ia ka tulop jong ki nonghikai SSA.
U bah Aristotle u la iathuh ruh ba na ka liang jong ki nongialam ka MSSASA ki la leit ia kynduh ia u State Project Director of Education u Swapnil Tembe ha ka 10 tarik mynta u bnai ban ia kren haba ia dei bad kine ki artylli ki mat jingdawa jong ki nonghikai ssa, na ka liang u State Projector ka tnad pule puthi ka jylla u la ong ba na ka liang jong u la bthat ia ka tnad pule ban pynkhreh ia ka dorkhas ban phah sha ka Cabinet ha ba ia dei bad ka jingpynskhem thungkam pura ia ki nonghikai SSA bad mynta ka sah sa ka jingmynjur ka Cabinet bad haba ia dei bad ka jingkyntiew tulop u la ong ba dang pynsangeh shipor.