Kum shi bynta ka jingrakhe sngi pynneh pynsah Mariang ha satlad ka pyrthei ia kane ka jingrakhe hapoh ka jingialam jong u ma Cresentus Susngi MDC ka Nangbah Mihmyntdu la pynlong ia ka jingialang kaba lyngkot harud Thwai Sahsahkti wah Myntdu, kaba ha Mihmyntdu hapoh ka jingpyniaid jong u Chairman shnong jong ka Mihmyntdu u ma S. Phawa.
U ma Cresentus Susngi haba kren ha kane ka sngi u pynpaw ia ka jingkmen haba kum u MDC jong ki u la ioh ia kane ka lad ban pynlait symbai dohkha ha kane ka Thwai Sahsahkti wah Myntdu, ka ba don ha shnong Mihmyntdu. U ma Cresentus Susngi haba kren ha kane ka sngi u ong ha ryngkat ka jingiasngewthuh lang bad u Waheh Shnong bad ki nongkitkam shnong jong ka shnong Mihmyntdu, la jied ia kane ka Thwai Sahsahkti ban pynlait ia kine ki arhajar tylli ki symbai dohkha bad u kyntu ia ki ba kin ri kin sumar ba kine ki dohkha kiba la pynlait kin heh kin san na ka bynta ka jingmyntoi jong ki nongshong shnong bad u da kyntu ba kin peitngor na ki nonglehkam sniew kum ha kaba ber Dawai, tongjar, tongsasi bad kiwei de ki jingleh dusmon ha kaban pyniap ia kine ki dohkha kiba la pynlait. Ha ka juh ka por u ong ba na ka liang jong u kum u Nongmihkhmat jong ki sha ka Jaintia Hills Autonomous District Council un wad ki lad ki lynti ha ka ban tih pynheh bad pynbha shuh shuh ia ki sawdong sawkun jong kane ka Thwai. Nangta u ong ka jaka ka long kaba bit bha bad u kyntu ia ki Nongshong shnong ban iatreilang bad u ha kaba un thaw ki lad ki lynti na ka liang jong u (MDC) haduh ban da pynlong ia kane ka jaka kum kawei na ki jaka jngohkai ka ban khring ia ki paidbah napoh ka District bad nabar ban wan jngohkai ia kane ka jaka.
Ha shwa ka jingkren na u ma Cresentus Susngi, MDC la ioh ia ka jingkren pdiang burom bad sngewnguh ia u MDC da u Waheh Shnong jong ka Mihmyntdu ma Abul Phawa. U ma Abul Phawa haba kren ha kane ka sngi u iaroh ia ka jingshim khia jong u MDC wat lada u la long u Nongmihkhmat MDC jong ki dang tang ha kine ki khyndiat por bad u ai ka jingkyrkhu kyrdoh ba un (MDC) nangioh ia ka met ka phat kaba koit bakhiah ba un danglah ban shimkhia ia ka khia ka shon ki paidbah ka Constituency bad ban thaw ki lad ki lynti katba u lah ei na ka bynta ki kam pynroi pynpar hapoh ka Constituency.
Ha ka juh ka por u ma Abul Phawa u pynpaw ka jingsngewnguh ia u MDC na ka bynta kane ka jingpynlait symbai dohkha ha Thwai Sahsahkti jong ka wah Myntdu bad u kular ba na ka liang jong u, ki nongkitkam shnong bad ki nongshong shnong kin shimkhia ha ka ban ri ban sumar ia kine ki dohkha kiba la pynlait ha Thwai Sahsahkti ka wah Myntdu, Mihmyntdu bad pynthikna ba kin ai ka jingiatreilang na ka bynta ka jingbha jingmiat, jingroi jingpar jong ka shnong bad ka Constituency hi baroh kawei.
