Ka Raij Ialong hadien ba la pyndep ia ka Niam ka rukom ia ka kñia ka khriam ha U Blei, ki Blei ia ki Ryngkew, ki Basa ha kine ki laisngi laimiet lynter na ka bynta ka jinglehniam Behdeiñkhlam, ban beh ia ka Khlam ka ngoh napoh ka Shnong ka Thaw, ka Raij ka Muluk, ia kane ka jinglehniam ki la pynkut hynne ka sngi (12/08/2024) ha Aitnar Ialong, ha kaba u Symbud Myntri Rangbah ka Jylla ma Sniawbhalang Dhar u long u Kongsan bad u Pa Doloi Puramon Kynjin, Doloi Elaka Jowai u long u Symbud Kongsan.
U ma Sniawbhalang Dhar ha ka jingkren kyrkhu kyrdoh jong u ia ki Nongshong shnong jong ka Raij Ialong bad ia ki jingkyrkhu kyrdoh kaba ki la ioh ha ka shait ka nang, ka trei ka ktah bad ka kñia ka khriam kaba bha kaba miat kaba la sngewbha da U Blei, ki Blei, u ma Sniawbhalang u nangkitbok kitrwiang ia ki khun ka Raij ka Muluk Ialong ba U Blei Un nangkyrkhu kyrdoh ha baroh ki liang jong ka bha ka miat ka longbriew man briew.
Nangta haba kren ha kane ka sngi u ong ba kat kum ka Memorandum kaba ka Raij Ialong ka la ai ha u Myntri Rangbah Conrad K Sangma ha ka Behdeinkhlam 2023, mynta ka la urlong ha kaba na ka liang u Myntri Rangbah u la mang Tyngka kumba Arphewsan Klur Tyngka ban pynbha ia ka Aitnar Ialong.
Kham hashwa la ioh ruh ia ka jingkren kyrkhu kyrdoh ia ki khun jong ka Seinraij da u Symbud kongsan Doloi Puramon Kynjin bad ia ka jingialang kaba lyngkot la pyniaid da u ma Pyrkhat Shylla uba dei u President ka Seinraij Ialong.
