Ka kynhun Co-Ordination Committee on International Border (CCIB) mynta ka sngi kala leit ban ai da ka jingthoh sha ka ophis u Deputy Commissioner, West Jaintia Hills District, lyngba ka kong H.M.L. Kynta (MCS) Additional Deputy Commissioner (Revenue ban dawa pynsangeh shwa ïa ka jingthmu pynlong ïa ka joint Inspection/Survey naka bynta ka jingker sainar shiah ha ki bynta khappud bad ka Ri Bangladesh.
Ka CCIB kala pyrshah jur ïa kane ka jingkhot Joint Inspection ka ban long lashai ka sngi 20 tarik bad ka 21 tarik u Jymmang, 2025 ha ki bynta ka shnong Amjalong, Kyrweng bad Jaliakhola kiba dei ki shnong kiba dang hap hapoh ka West Jaiñtia Hills District jong ka Amlarem Sub-Division, namar kane ka kam ka dang don hapoh ka jingkhmih ka ïingshari ba don burom.
Na ka liang u Chairman Co-Ordination Committee on International Border (CCIB) bah Sukkynjai Myrchiang, ha ryngkat ki Dkhot ka Khasi Students’ Union (KSU), FKJGP bad HNYF, hadien ka jingïakynduh bad ka kong Kynta mynta ka sngi, ula ong na ka liang ki trai jaka kila dep ban ujor ïa kane ka kam ker sainar siah sha ka ïing bishar naduh u snem 2021.
Shuh shuh ula ong na ka liang ka CCIB ha ryngkat ki trai jaka jong kitei ki thaiñ “kim pyrshah satia ïa kane ka jingthmu ker sainar siah, hynrei ka jingdawa ba kongsan jong ki ka long ba ki trai shnong kim dei ban duh ïa ka jaka bad ki puta jong ki na ka jingker sainar siah”.
Halor kane ka CCIB ka kyntu jur ïa ki bor District ba kin pynsangeh shwa ban pynlong ïa kane ka Join Inspection, katba ka kam ïa pynbeit ka dang don ha hapoh ka ïing bishar khnang ban lait na kino kino ki jingeh, da kaba ailad shwa ïa ka ïingshari (Court) ban shim ïa ka rai.
