Ka Jaiñtia Students’ Movement (JSM), Western Region mynta ka sngi kala leit ban ïakynduh ïa ka District School Education Officer (DSEO) ka West Jaiñtia Hills District Jowai, ha ryngkat ka jingthoh ban pynsngew halor ka jingduh Admission Class-XI ki samla pule naka bynta une u snem.
Ka seng kala shim ïa kane ka sien jam, hadien ba la ïoh shibun ki jingkyrpad na ki samla pule kiba dang duh Admission ha ki skul bapher bapher hapoh ka District. Ka seng ka pynpaw ruh ka jingsngewkhia ïa kane ka jingduh Klas jong ki samla pule ha ki kyrdan Higher Secondary School, na ka daw ka jingbun kiba pass ïa ka Result SSLC na West Jaiñtia Hills.
Shuh shuh ka seng kala ong kane ka jingduh klas jong ki samla pule ka lah ban dei na ka jingrit jong ki kamra klas, kaba la pynduna ïa ki jingdon u Seat ha ki skul. Kumta ka seng kala dawa ban pynbuh ïa ki seat kum ha Government Boys bad Girls HS School, Jowai bad ha Kiang Nangbah Government HS School Jowai.
Ha ka jingïakren hapdeng ki nongïalam ka seng bad ka DSEO kila kyrpad jur na ka ophis jong ka tnad pule puthi ba ka dei ban leh mardor ïa kaba donkam, na ka bynta ban pynïoh klas ïa ki samla pule ha kine ki sngi ban wan. Ka seng kala ong ba ka pule puthi ka long kaba donkam bha haka jingim bad ka bha ka miat ka lawei bad ka jingim jong ki khun samla ka Ri bad ka jaitbynriew, kumta ka JSM ka kwah baroh ki khynnah ki ïoh beit ïa ka Admission mynta u snem.