Ka Jaiñtia Students’ Union (JSU) seng kmie hadien ka jingïoh ujor na ki nongsam khaw rashon (dealer), halor ka jingduna kilo palat jong u khaw rashon hashwa ban sam sha ki nongïoh myntoi hapoh ka District.
Mynta ka sngi 22 tarik u Ïaïong ha ryngkat ki sakhi sabut kila leit ban ujor sha u Deputy Commissioner (Supply) ka West Jaiñtia Hills District ba un tuklar mardor ïa kane ka kam, khnang ba ka jingbiang kilo jong u khaw hapoh ka District kan long kaba ïaid beit ïaid ryntih.
U General Secretary ka seng u samla Neilkee Mukhim ula ong hadien ka jingïakynduh bad u DC na ka liang jong u ruh, ula kular ha ki nongïalam ka seng ba ki bor District Supply ba kin pynlong ïa ka jingleit jurip ïa kane ka kam hapoh 15 sngi naduh ba ïoh ïa kane ka jingujor.
Shuh shuh ula pynsngew kiba bun ki Dealer hapoh ka West Jaiñtia Hills kila dep ban ujor la bunsien ïa kane ka jingduna kilo u khaw rashon uba ki ïoh na ki jaka pynpoi khaw FCI, ka jingduna u khaw napoh ka byrni kala long shaba palat namar ki don ki byrni kiba la don tang 42 kilo bad ki don ruh haduh 39 kilo ha ka jaka 50 kilo.
Na ka liang ka seng kala sngew donkam ban pynbiet noh ïa kane ka kam kaba sahteng la slem bha, ha ka juh ka por ka seng kala kren shai ba lada ki bor sorkar kim lah ban shimkhia ïa kane, kim banse shuh ban leit ujor shaduh ka ïing bishar ba donburom.
