Ka Seng ki Nonghikai SSA hapoh ka Shatri jong ka All Meghalaya Sarva Shiksha Abhiyan School Central Body, ha ka 19 Tarik u Nailar ki la wan pynshai halor ka jingshah set tulop jong ki, namar kum ka jingtip jong ki, ia ka tulop lah dep ban pyllait hynrei namar ka jingiakhih jong ki Non- Teaching Staffs jong ka SSA, ka daw ba pynlong ia ba kan slem ban poi sha ki.
Haba kren sha ki ladphatai khubor na ka liang u President jong ka Seng u bah Aristotle Rymbai u la ong ba na ka liang jong ki, kim pyrshah ia ka jing iakhih jongno jongno ruh, namar baroh, ki don ka hok ban ia khih, hynrei ka jingiakhih jong ki, kam dei ban ktah pat ia ka tulop jong ki nonghikai SSA.
Na ka liang katei ka khynhun ka kyntu ruh ia ka sorkar ban thaw ki lad ki lynti ban pyllait noh kham kloi, ia ka tulop jong ki nonghikai SSA.
Shuh shuh katei ka khynhun jong ki nonghikai, ka la pynshai halor ka jing don kawei pat ka khynhun Nonghikai SSA kaba la ong, ba ki lah ban shah, lada shah set tulop, lai saw bnai ruh, hynrei na ka liang jong ki, kim lah ban shah namar kat kum ka jingiakren ha ki snem ba lah dep bad ka Sorkar, ka tulop ka dei ban ioh man ka bnai.
