Ki dkhot jong ka seng HYC East Jaiñtia Hills mynta ka sngi kila leit ban ia kynduh ia u DC ka East Jaiñtia Hills District u Shivansh Awasthi, IAS, na ka bynta ban dawa pynkynriah ia ka sngi thoh Exam jong ki samla namar ba ki don ar tylli ki Exam ialehkam sorkar kiba ia tyngkhuh ha ka juh ka sngi.
Na ka liang ka HYC EJH kala pynpaw ba kine ki ar tylli ki Exam ialehkam ki dei ka National Ayush Mission Exam kaba la buh ban pynlong ha ka 3/8/2024 ha Jaiñtia Eastern College, Khliehriat, katkum ka Notification No. DM&HO/EJHD/Genl.NAM-461/2023-24/7883, dated 25/07/2024, kaba la pynmih da ka ophis District Medical and Health Officer (DMHO), Khliehriat.
Katba ka wei pat ka dei kaba yn pynlong da ka Director of Health Services (MI), Meghalaya, Shillong kaba yn sa pynlong ha nongbah Shillong ha kajuh ka tarik kata ha ka 3/8/2024.
Kane ka jingiatyngkhuh sngi kala wan rah jingeh ia ki samla wad kam wad jam jong ka District bad kila pynpaw ruh ka jingeh sha ki nongialam jong ka seng HYC, ha kaba ka seng kala leit dalade ban iakynduh ia u DC ka East Jaiñtia ban kyntu ia u ban pynkynriah sngi noh ia ka Exam jong ka District, ha ka wei pat ka por.