Ki dkhot jong ka Hynñiewtrep Achik National Movement (HANM) mynta ka sngi ka 18 tarik Naitung hapoh ka jingialam jong President bah Lamphrang Kharbani, ki la leit ban ïakynduh ia ka DGP, Kong Aidashisha Nongrang, IPS, halor ka jingioh rung laitlan ki briew na Bangladesh ha kane ka jylla bad ka jingjyllei ka jingdie bad dih drok kylleng ki jaka khappud, kynthup ha Balat bad Dangar.
Ha kane ka sngi, na ka liang u President ka HANM, u Bah Lamphrang Kharbani u la aiti ruh da ka dorkhas halor ka jingbym lah ban iada ia ka jingioh rungtuh jong ki briew kiba nabar da kaba kdew ruh ba don kiba la kamai pisa haduh 10 hajar na ka bynta ban ailad ia ki briew na Bangla ban rung ha ri Khasi. Ki la ai jingmut ruh ia ka DGP ban shimkhia da kaba iakren sani bha bad ki shipai BSF kiba don ha ki khappud.