Ka long kaba sngewsih ban peit bad ban kren ba ka EJH District ka dei ruh ka District ba pynmih revenue ia ka sorkar ka dang sahdien ha ki ba ba bun ki liang jong ka Roi ka par. Khamtam eh ha ka liang ka lynti synkieng kaba paw shai ha ka jinglap jong ka seng Hynniewtrep Youth Council (HYC) East Jaintia Hills da ki khmat bad wat ha ki social media ha kine ki por ba la dep.
Ka seng ka kwah ban pynpaw hangne iaka jingeh jingshitom kaba ki nongshong shnong jong ka Saipung Block ki iakynduh ha ka liang ka kit ka bah ka lynti synkieng naduh ki por mynshwa bad tad haduh kine kipor ba la ioh ia ka District ba pura ka East Jaintia. Ka jing bym biang ki surok ka ktah mationg ia kine briew ki ba sah ha baroh ki shnong ne ki thaiñ jongka Block naduh haka jingleit iew leit hat, leit donkam sha ki office sorkar, leit skul ki khynnah, bad khamtam eh haka por ban kit ia kiba pang sha ki jaka sumar, khamtam eh ha kum kine ki por ba hap slap kito ki shnong ki ba don sha kyndong kum ka shnong Khahnar bad khamtam eh ki shnong Saibul, Thuruk, Moulsei, Molian bad kiwei kiwei de ki shnong ki bym lah ban jer kyrteng ki hap ban leit da ki kjat ban leit iew leit hat lane ban leit shim dawai ne leit sha ki jaka ai dawai haba don ba shitom ne pang, iakane ka seng ka lah sakhi da la jong ki khmat bad lah ban iohi ruh hi ki dur ha ki social media.
Kum ba iatip lang ba U surok u dei u budlum jong ka Roi ka Par kadei namar kata ba kane ka Block ka dang sahdien bha ha baroh ki liang jongka roi ka par, ha ki kam khaii pateng, pule puthi bad kiwei kiwei de. ‘ka seng ka kwah ban buh jing kylli ba kane ka dei ka jing bym kitkhlieh ki bor pyniaid District ne bym lerkam ki nongmihkhmat paidbah (representatives) lane ka Sorkar.
Ka seng ka kwah ban pynpaw eh ia ka jing bymlah/Fail ki bor ba halor ban wanrah ka roi ka par ha kane ka Block bad ka pynpaw eh ruh ia ka jingdawa kaba jur ba ki nong pyniaid District/Nongmihkhmat/Sorkar ban moramot mardor ia ki surok jong ka ne ka Block.